୧୧ ଟି ୱାର୍ଡରେ ବିଜେଡି ବିଜୟୀ

ଅତାବିରା (ବଡ଼ ଖବର ବ୍ୟୁରୋ): ଅତାବିରା କାହାର ହେବ, ସେନେଇ ଅଙ୍କକଷାରେ ପଡ଼ିଛି ପୂର୍ଣ୍ଣଛେଦ । ଆଜି ବରଗଡ଼ ଜିଲ୍ଲା ଅତାବିରା ଏନ୍‌ଏସି ନିର୍ବାଚନ ଫଳାଫଳ ଘୋଷଣା ହୋଇଛି । ନଗରପାଳ ସହ ୧୧ଟି କାଉନସିଲର ପଦବୀ ବିଜେଡି ପୋଛି ନେଇଛି । କେବଳ ୧ନମ୍ବର ୱାର୍ଡରେ କଂଗ୍ରେସର ଦୀପକ ରାୟ ବିଜୟୀ ହୋଇଛନ୍ତି । ତାଙ୍କ ନିକଟତମ ବିଜେଡି ପ୍ରାର୍ଥୀ ସତ୍ୟନାରାୟଣ ମିଶ୍ରଙ୍କୁ ୧୮ଟି ଭୋଟରେ ହରାଇ କଂଗ୍ରେସର ଦୀପକ ରାୟ ଦଳର ସମ୍ମାନ ରଖିଛନ୍ତି ।

ସେପଟେ ଗଣତି ପାଇଁ ପ୍ରଶାସନ ପକ୍ଷରୁ ବ୍ୟାପକ ପ୍ରସ୍ତୁତି ହୋଇଥିଲା । ସକାଳ ୮ଟାରୁ ୪ଟି ଟେବୁଲରେ ଚାରି ରାଉଣ୍ତ ଗଣତି ହୋଇ ସକାଳ ୧୦ଟାରେ ଫଳାଫଳ ଆସିଥିଲା । ଉଭୟ ଅଧ୍ୟକ୍ଷ ଓ କାଉନସିଲର ପାଇଁ ଦୁଇଟି ଟେବୁଲ୍‌ରେ ଦୁଇ ରାଉଣ୍ଡ ଲେଖାଏଁ ଗଣତି ପରେ ଫଳାଫଳ ଘୋଷଣା ହୋଇଥିଲା । ଫଳାଫଳ ଆସିବା ପରେ ବିଜେଡି ବିଧାୟିକା ସ୍ନେହାଙ୍ଗିନୀ ଛୁରିଆଙ୍କ ନେତୃତ୍ୱରେ ବିଜୟ ଉଲ୍ଲାସ ମନାଉଛି । ଫଳାଫଳ ବାହାରିଥିବା ବ୍ଲକ ଅଫିସ ସାମ୍ନାରୁ ଦୁର୍ଗା ମନ୍ଦିର ଯାଏଁ ବିଜୟ ଉଲ୍ଲାସ ରାଲି କରୁଛି ବିଜେଡି ।