ଯେତେବେଳେ ଅମିତ ଶାହାଙ୍କୁ ପବ୍ଲିକରେ ଦେଖାଇବାକୁ ପଡ଼ିଥିଲା ମୋଦିଙ୍କ ଡିଗ୍ରୀ

ନୂଆଦିଲ୍ଳୀ (ବଡ଼ ଖବର ବ୍ୟୁରୋ): ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଶିକ୍ଷାଗତ ଯୋଗ୍ୟତାକୁ ନେଇ ପ୍ରଶ୍ନ ଉଠିଛି । ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ବାରମ୍ବାର ପ୍ରଶ୍ନ ଉଠାଇ ଆସୁଛନ୍ତି । ଅରବିନ୍ଦ କେଜ୍ରିୱାଲ ପ୍ରଧାନମନ୍ତ୍ରୀଙ୍କୁ ଅଶିକ୍ଷିତ କହିବାକୁ ନେଇ ତାଙ୍କ ଉପରେ ଗୁଜୁରାଟ ହାଇକୋର୍ଟ ୨୫ହଜାର ଜରିମାନା ବି ଲଗାଇଛନ୍ତି । ପୂର୍ବରୁ ୨୦୧୬ରେ କେଜ୍ରିୱାଲ ଏହି ପ୍ରଶ୍ନ ଉଠାଇଥିଲେ । ଯାହାର ଉତ୍ତର ମଧ୍ୟ ରଖିଥିଲେ କେନ୍ଦ୍ର ଗୃହମନ୍ତ୍ରୀ ଅମିତ ଶାହା । ସାମ୍ବାଦିକ ସମ୍ମିଳନୀ କରି କେଜ୍ରିୱାଲଙ୍କ ଉପରେ ବର୍ଷିବା ସହ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଶିକ୍ଷାଗତ ସାର୍ଟିଫିକେଟ ସାର୍ବଜନୀନ କରିଥିଲେ ।

ଅମିତ ଶାହା କହିଥିଲେ, ଅରବିନ୍ଦ କେଜ୍ରିୱାଲ ଏଭଳି ମିଥ୍ୟା ଅଭିଯୋଗ କରି ଲୋକଙ୍କୁ ବିଭ୍ରାନ୍ତ କରୁଛନ୍ତି। ଏହା ଅତ୍ୟନ୍ତ ଦୁର୍ଭାଗ୍ୟଜନକ ଯେ ପ୍ରଧାନମନ୍ତ୍ରୀଙ୍କ ଶିକ୍ଷାଗତ ଯୋଗ୍ୟତା ସ୍ଥିତି ସ୍ପଷ୍ଟ କରିବାକୁ ଆମକୁ ଏହି ପ୍ରେସମିଟ୍ ଆୟୋଜନ କରିବାକୁ ପଡ଼ିଛି । ଅମିତ ଶାହା ଏବଂ ଅରୁଣ ଜେଟଲି ପ୍ରଧାନମନ୍ତ୍ରୀଙ୍କ ଦିଲ୍ଲୀ ବିଶ୍ୱବିଦ୍ୟାଳୟରୁ ସ୍ନାତକୋତ୍ତର, ଗୁଜୁରାଟ ବିଶ୍ୱବିଦ୍ୟାଳୟରୁ ରାଜନୀତି ବିଜ୍ଞାନରେ ଏମଏ ଡିଗ୍ରୀ ସାର୍ବଜନୀନ କରିଥିଲେ । ଏବଂ କହିଥିଲେ କେଜ୍ରିୱାଲ ଦେଶର ଅପମାନ କରିଛନ୍ତି ଏଥିପାଇଁ ତାଙ୍କୁ କ୍ଷମା ମାଗିବା ଦରକାର ।