https://youtu.be/tQuEM_imHiw
ନୂଆଦିଲ୍ଲୀ (ବଡ଼ ଖବର ବ୍ୟୁରୋ): କିଏ ହେବ ସିଏମ୍ । କାହା ମୁଣ୍ଡରେ ସୁନା ମୁକୁଟ । ମଧ୍ୟପ୍ରଦେଶ, ରାଜସ୍ଥାନ ଛତିଶଗଡ଼ ରାଜ୍ୟରେ କିଏ ସମ୍ଭାଳିବ ଦାୟିତ୍ୱ । ମୁଖ୍ୟମନ୍ତ୍ରୀ ରେସକୁ ନେଇ ଚର୍ଚ୍ଚା ଜୋର ଧରିଥିବା ବେଳେ ବିଜେପି ଆପଣାଇଛି ଭିନ୍ନ ତରିବା । ତିନି ରାଜ୍ୟ ପାଇଁ ପର୍ଯ୍ୟବେକ୍ଷକ ତାଲିକା ପ୍ରକାଶ କରିଛି ଭାରତୀୟ ଜନତା ପାର୍ଟି । ମଧ୍ୟପ୍ରଦେଶ ପାଇଁ ହରିୟାଣା ସିଏମ ମନୋହର ଲାଲ ଖଟ୍ଟର, କେ ଲକ୍ଷ୍ମଣ, ଆଶା ଲାକ୍ରାଙ୍କୁ ଦାୟିତ୍ୱ ଦିଆଯାଇଛି । ସେପଟେ ରାଜସ୍ଥାନ ପାଇଁ ରାଜନାଥ ସିଂ, ବିନୋଦ ତାୱଡେ, ସରୋଜ ପାଣ୍ଡେଙ୍କ ପର୍ଯ୍ୟବେକ୍ଷକ ଭାବେ ବଛା ଯାଇଛି । ଛତିଶଗଡ଼ ରାଜ୍ୟ ପାଇଁ ଅର୍ଜୁନ ମୁଣ୍ଡା, ସର୍ବାନନ୍ଦ ସୋନୋୱାଲ ଓ ଦୁଷ୍ୟନ୍ତ ଗୌତମଙ୍କ ନାଁ ଉପରେ ମୋହର ମାରିଛି ବିଜେପି ପାର୍ଟି ।
ଏହି ପର୍ଯ୍ୟବେକ୍ଷକମାନେ ତିନି ରାଜ୍ୟକୁ ଯାଇ ବିଭିନ୍ନ ଦିଗକୁ ନେଇ ତର୍ଜମା କରିବେ । ବିଧାୟକମାନଙ୍କ ସହ ଆଲୋଚନା କରିବେ । ଶେଷରେ ଫାଇନାଲ ରିପୋର୍ଟ ହାଇକମାଣ୍ଡକୁ ଦେବେ । ଆଉ ତାପରେ ହାଇକମାଣ୍ଡ ହିଁ ନିଷ୍ପତ୍ତି ନେବେ ଯେ ଏହି ତିନି ରାଜ୍ୟର ମୁଖ୍ୟମନ୍ତ୍ରୀ କିଏ ହେବ । ତିନି ରାଜ୍ୟରେ ଭାରତୀୟ ଜନତା ପାର୍ଟି ବିଜୟ ଲାଭ କରିବା ପରେ କିଏ ହେବେ ମୁଖ୍ୟମନ୍ତ୍ରୀ ତାକୁ ନେଇ କଳ୍ପନା ଜଳ୍ପନା ଲାଗି ରହିଥିଲା । ସିଏମ୍ ରେସରେ ଅନେକ ନା ଆଗକୁ ଆସିଥିବା ବେଳେ ତାକୁ ନେଇ ଦ୍ୱନ୍ଦ୍ୱ ଦେଖାଦେଇଛି । ମଧ୍ୟପ୍ରଦେଶ, ରାଜସ୍ଥାନ ଓ ଛତିଶଗଡ଼ର ପୂର୍ବତନ ମୁଖ୍ୟମନ୍ତ୍ରୀ ଶିବରାଜ ସିଂ ଚୌହାନ, ବସୁନ୍ଧରା ରାଜେ ଓ ରମଣ ସିଂଙ୍କ ଉପରେ ଆଉ ଭରସା କରିପାରୁନାହିଁ ଦଳ । ନୂଆ ଚେହେରାକୁ ଆଗକୁ ଆଣିବାକୁ ଚାହୁଁଛି ପାର୍ଟି । ଖୁବଶୀଘ୍ର ଜଣାପଡ଼ିବ ମଧ୍ୟପ୍ରଦେଶ, ରାଜସ୍ଥାନ ଓ ଛତିଶଗଡ଼ର କିଏ ହେବ ମୁଖ୍ୟମନ୍ତ୍ରୀ ।
