ଭାରତ ଆସୁଛନ୍ତି ଚୀନ୍ ରାଷ୍ଟ୍ରପତି!
ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ଛଅ ବର୍ଷ ପରେ ଭାରତ ଆସିବେ ଚୀନ୍ ରାଷ୍ଟ୍ରପତି ସି ଜିନପିଙ୍ଗ । ନୂଆଦିଲ୍ଲୀରେ ସେପ୍ଟେମ୍ବର ୧୨ ଓ ୧୩ତାରିଖରେ ଅନୁଷ୍ଠିତ ହେବାକୁ ଥିବା ବ୍ରିକ୍ସ ସମ୍ମିଳନୀରେ ଯୋଗ ଦେଇପାରନ୍ତି ରାଷ୍ଟ୍ରପତି ସି ଜିନପିଙ୍ଗ । ୨୦୨୦ ମସିହାରେ ଗଲୱାନ ଉପତ୍ୟକାରେ ଭାରତ-ଚୀନ ସେନାଙ୍କ ମଧ୍ୟରେ ହୋଇଥିବା ରକ୍ତକ୍ଷୟୀ ସଂଘର୍ଷ ପରେ ଏହା ହେବ ସି ଜିନପିଙ୍ଗଙ୍କର ପ୍ରଥମ ଭାରତ ଗସ୍ତ। ଏହି ଘଟଣା ପରେ ଦୁଇ ଦେଶର ସମ୍ପର୍କ ଗତ କିଛି ଦଶନ୍ଧି ମଧ୍ୟରେ ସବୁଠାରୁ ନିମ୍ନ ସ୍ତରକୁ ଖସିଯାଇଥିଲା। ଲଦାଖ ସୀମାରେ ବର୍ଷ ବର୍ଷ ଧରି ଚାଲିଥିବା ସାମରିକ ଅଚଳାବସ୍ଥା ପରେ ଭାରତ ଓ ଚୀନ ମଧ୍ୟରେ ସମ୍ପର୍କ ଧୀରେ ଧୀରେ ସ୍ୱାଭାବିକ ହେବା ଦିଗରେ ଏହି ଗସ୍ତକୁ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ବୋଲି ଦେଖାଯାଉଛି। ସି ଜିନପିଙ୍ଗ ୨୦୧୩ ମସିହାରୁ ଚୀନର ରାଷ୍ଟ୍ରପତି ଅଛନ୍ତି ଏବଂ ଏହା ପୂର୍ବରୁ ସେ ୩ ଥର ଭାରତ ଗସ୍ତ କରିଛନ୍ତି। ତାଙ୍କର ଶେଷ ଭାରତ ଗସ୍ତ ୨୦୧୯ ଅକ୍ଟୋବରରେ ହୋଇଥିଲା।
ଏହାର କିଛି ମାସ ପରେ ଏଲଏସିରେ ସାମରିକ ସଂଘର୍ଷ ହୋଇ ଦୁଇ ଦେଶର ସମ୍ପର୍କରେ ବଡ଼ ଫାଟ ସୃଷ୍ଟି ହୋଇଥିଲା। ଆଗାମୀ ସପ୍ତାହଗୁଡ଼ିକରେ ଭାରତ-ଚୀନ୍ ସୀମା ମାମଲା ଉପରେ ‘କନ୍ସଲଟେସନ୍ ଏବଂ କୋଅର୍ଡିନେସନ୍ ପାଇଁ ୱାର୍କିଂ ମେକାନିଜିମ୍’ ର ବୈଠକ ହେବାର ମଧ୍ୟ ଆଶା ରହିଛି, ଯାହା ପରେ ସୀମା ବିବାଦ ଉପରେ ଦୁଇ ଦେଶର ସ୍ୱତନ୍ତ୍ର ପ୍ରତିନିଧିଙ୍କ ମଧ୍ୟରେ ଆଲୋଚନା ହେବ। ଭାରତ-ଚୀନ୍ ମଧ୍ୟରେ ଦୀର୍ଘ ଦିନରୁ ଚାଲିଆସୁଥିବା ସୀମା ବିବାଦ ଉପରେ ଆଲୋଚନାକୁ ଆଗକୁ ବଢ଼ାଇବା ପାଇଁ ସହମତି ହେବା ପରେ ଏହା ଏହାର ପ୍ରଥମ ବୈଠକ ହେବ। ଏହି ବୈଠକରେ ସୀମା ବିବାଦ, ଆଞ୍ଚଳିକ ସୁରକ୍ଷା, ଆର୍ଥିକ ସହଯୋଗ ଏବଂ ଏସିଆର ଦୁଇ ପ୍ରମୁଖ ଶକ୍ତିଶାଳୀ ଦେଶ ମଧ୍ୟରେ ଭବିଷ୍ୟତ ସମ୍ପର୍କର ଦିଗ ଉପରେ ଆଲୋଚନା ହେବାର ସମ୍ଭାବନା ରହିଛି।