ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ଜି-୨୦କୁ ନେଇ ସବୁଆଡେ ଚର୍ଚ୍ଚା ଚାଲିଥିବାବେଳେ ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ ଜି -୨୦ ରାତ୍ରୀ ଭୋଜନରେ ଯୋଗଦେବା ପରେ ବିବାଦ ଉପୁଜିଛି। ତାଙ୍କ ସହ ମେଣ୍ଟ ଗଠନ କରୁଥିବା କଂଗ୍ରେସ ପ୍ରଶ୍ନ ଉଠାଇଛି। ବରିଷ୍ଠ କଂଗ୍ରେସ ନେତା ଆଧୀର ରଂଜନ ଚୌଧୁରୀ ରବିବାର ଦିଲ୍ଲୀରେ ଜି -୨୦ ବୈଠକରେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଦ୍ୱାରା ଆୟୋଜିତ ରାତ୍ରି ଭୋଜନରେ ଯୋଗଦେବା ପାଇଁ ମମତା ବାନାର୍ଜୀଙ୍କ ନିଷ୍ପତ୍ତି ଉପରେ ପ୍ରଶ୍ନ କରିଛନ୍ତି । ଅଧୀର ଗଣମାଧ୍ୟମକୁ କହିଛନ୍ତି ଯେ ବହୁ ଅଣ-ବିଜେପି ମୁଖ୍ୟମନ୍ତ୍ରୀ ରାତ୍ରୀ ଭୋଜନରେ ଯୋଗଦେବାକୁ ଏଡାଇ ଦେଇଥିବା ବେଳେ ଦିଦି (ମମତା ବାନାର୍ଜୀ) ଗୋଟିଏ ଦିନ ପୂର୍ବରୁ ଦିଲ୍ଲୀ ଯାଇଥିଲେ।
ଏହି ଅବସରରେ ଆୟୋଜିତ କାର୍ଯ୍ୟକ୍ରମରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହା ଏବଂ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଉପସ୍ଥିତ ଥିଲେ। ସେ କହିଛନ୍ତି ମୁଁ ଆଶ୍ଚର୍ଯ୍ୟ ହେଉଛି ଯେ ଏହି ନେତାଙ୍କ ସହ ରାତ୍ରି ଭୋଜନରେ ଯୋଗଦେବା ପାଇଁ ତାଙ୍କୁ ଦିଲ୍ଲୀ ଯିବାକୁ କ’ଣ ପ୍ରବର୍ତ୍ତାଗଲା? କହିବାକୁ ଗଲେ ମୁଖ୍ୟମନ୍ତ୍ରୀ ମମତା ବାନାର୍ଜୀ ଶୁକ୍ରବାର ଦିନ ଦିଲ୍ଲୀ ଯାଇଥିବାବେଳେ ପରଦିନ ରାତ୍ରୀ ଭୋଜନ ଆୟୋଜନ କରାଯାଇଥିଲା। ଏହା ଉପରେ ଚୌଧୁରୀ ପଚାରିଥିଲେ ଯେ ଏହି ଉତ୍ସବରେ ଯୋଗଦେବା ପଛରେ ଅନ୍ୟ କୌଣସି କାରଣ ଅଛି କି?
ସେପଟେ କାଉଣ୍ଟର ଆଟାକ୍ କରିଛି ଟିଏମସି । ଅଧୀରଙ୍କ ବିବୃତ୍ତିରେ ଜବାବ ଦେଇ ଟିଏମସି ରାଜ୍ୟସଭା ସାଂସଦ ଶାନ୍ତନୁ ସେନ୍ କହିଛନ୍ତି ଯେ ସମସ୍ତେ ଜାଣନ୍ତି ଯେ ମମତା ବାନାର୍ଜୀ ବିରୋଧୀ ଦଳ ‘ଇଣ୍ଡିଆନ୍ ନ୍ୟାସନାଲ ଡେଭଲପମେଣ୍ଟ ଇନକ୍ଲୁସିଭ୍ ଆଲାଇନ୍ସ’ (ଇଣ୍ଡିଆ) ର ସୁତ୍ରଧରରୁ ଜଣେ । ତାଙ୍କ ପ୍ରତିବଦ୍ଧତାକୁ ଉପରେ କେହି ପ୍ରଶ୍ନ କରିପାରିବେ ନାହିଁ। ପ୍ରୋଟୋକଲ୍ ଅନୁଯାୟୀ ଜି -୨୦ ରାତ୍ରୀ ଭୋଜନରେ ଯୋଗଦେବାକୁ ରାଜ୍ୟ ମୁଖ୍ୟମନ୍ତ୍ରୀ କେବେ ଯିବେ ତାହା ଚୌଧୁରୀ ନିଷ୍ପତ୍ତି ନେବେ ନାହିଁ।
