ମହାପୁରୁଷଙ୍କୁ ଅପମାନ, ମହତାବଙ୍କ ଜାଗାରେ ଲେଖା ହେଲା ମହାନ୍ତି

ଭଦ୍ରକ (ବଡ଼ ଖବର ବ୍ୟୁରୋ): ସତରେ ବିଡମ୍ବନା । ମହାପୁରୁଷଙ୍କୁ ଅପମାନ । ନବ ଓଡ଼ିଶାର ବିନ୍ଧାଣୀ, ଓଡ଼ିଶା ଇତିହାସର ଧ୍ରୁବତାରା, ପ୍ରଚଣ୍ଡ ବାଗ୍ମୀ, ସାହିତ୍ୟିକ, ଓଡ଼ିଶାର ପୂର୍ବତନ ମୁଖ୍ୟମନ୍ତ୍ରୀ, କେନ୍ଦ୍ରମନ୍ତ୍ରୀ, ସ୍ୱାଧୀନତା ସଂଗ୍ରାମୀ, ଭଦ୍ରକ ମାଟିର ସୁଯୋଗ୍ୟ ସନ୍ତାନ ଉତ୍କଳ କେଶରୀ ଡକ୍ଟର ହରେକୃଷ୍ଣ ମହତାବଙ୍କ ନାଁକୁ ବିକୃତ କରାଯାଇଛି । ଭଦ୍ରକ ଧାମନଗରରେ ଉତ୍କଳ କେଶରୀ ଡକ୍ଟର ହରେକୃଷ୍ଣ ମହତାବଙ୍କ ନାଁକୁ ଭୁଲ ଲେଖାଯାଇଛି।

ଧାମନଗର ଉର୍ଦ୍ଦୁ ପ୍ରାଥମିକ ବିଦ୍ୟାଳୟ କାନ୍ଥରେ ଦେଖିବା ପାଇଁ ମିଳିଛି ଏଭଳି ବିକୃତ ଲେଖା । ହରେକୃଷ୍ଣ ମହତାବଙ୍କ ଫଟୋ ତଳେ ହରେକୃଷ୍ଣ ମହାନ୍ତି ବୋଲି ଲେଖାଯାଇଛି । ଯାହାକୁ ଦେଖିବା ପରେ ବୁଦ୍ଧିଜୀବୀ ଓ ଲୋକଙ୍କ ଭିତରେ ପ୍ରବଳ ପ୍ରତିକ୍ରିୟା ଦେଖିବାକୁ ମିଳିଥିଲା । ପରେ ମହାନ୍ତି ଉପରେ ରଙ୍ଗ ବୋଳାଯାଇ ପୁଣି ଥରେ ମହତାବ ଲେଖି ତ୍ରୁଟି ସଂଶୋଧନ କରାଯାଇଛି ।