କୋଭିଡ୍ ଟେଷ୍ଟି ଲାଗି ଅନୁଗୁଳ ମୁଖ୍ୟ ଚିକିତ୍ସାଳୟରେ ପ୍ରବଳ ଭିଡ଼

ଅନୁଗୁଳ (ବଡ଼ ଖବର ବ୍ୟୁରୋ): ରାଜ୍ୟରେ ହୁ ହୁ ହୋଇ ବଢ଼ିବାରେ ଲାଗିଛି କରୋନା ଆକ୍ରାନ୍ତଙ୍କ ସଂଖ୍ୟା । ଏଥିରୁ ବାଦ ପଡ଼ିନାହିଁ ଅନୁଗୁଳ ଜିଲ୍ଲା । ଜିଲ୍ଲା ମୁଖ୍ୟ ଚିକିତ୍ସାଳୟରେ ଟେଷ୍ଟିଂ ପାଇଁ ଲାଗୁଛି ପ୍ରବଳ ଭିଡ଼ । ସୀମିତ ସଂଖ୍ୟକ ଟେଷ୍ଟ ହେଉଥିବାରୁ ଲୋକଙ୍କ ମଧ୍ୟରେ ଦେଖାଦେଉଛି ଅସନ୍ତୋଷ । ସକାଳୁ ଲୋକେ ଲାଇନରେ ଠିଆ ହେଉଥିବା ମଧ୍ୟ ଦେଖିବାକୁ ମିଳୁଛି । ଜିଲ୍ଲାରେ ୮୩ ହଜାର ୫୮୬ ସମ୍ପଲ ଟେଷ୍ଟ ସରିଥିବା ବେଳେ ୫ ହଜାର ୪୨୦ ଜଣଙ୍କ ରିପୋର୍ଟ ପଜିଟିଭ ଆସିଛି । ୯ଜଣଙ୍କ ମୃତ୍ୟୁ ହୋଇଛି । ଏହାକୁ ଦୃଷ୍ଟିରେ ରଖି ଜିଲ୍ଲା ସଦରମହକୁମାରେ ଥିବା ବ୍ୟବସାୟୀମାନେ ଆସନ୍ତା ୧୦ ତାରିଖଠାରୁ ସକାଳ ୭ରୁ ଅପରାହ୍ଣ ୨ଟା ପର୍ଯ୍ୟନ୍ତ ଦୋକାନ ଖୋଲିବାକୁ ନିଷ୍ପତ୍ତି ନେଇଛନ୍ତି । ଏନେଇ ବ୍ୟବସାୟୀ ସଂଘ ଜିଲ୍ଲାପାଳଙ୍କ ସହ ଆଲୋଚନା କରିଛି । ବ୍ୟବସାୟୀ ସଂଘର ଏହି ନିଷ୍ପତ୍ତିକୁ ସାଧାରଣରେ ସ୍ୱାଗତ କରାଯାଉଛି ।