ବାଇକ ଧକ୍କାରେ ମୃତ୍ୟୁକୁ ନେଇ ରାସ୍ତାରୋକ
ବଲାଙ୍ଗିର (ବଡ଼ ଖବର ବ୍ୟୁରୋ):ବାଇକ ଧକ୍କାରେ ଜଣଙ୍କ ମୃତ୍ୟୁ ଘଟଣା ପ୍ରତିବାଦରେ କରାଯାଇଛି ରାସ୍ତାରୋକ । କ୍ଷତିପୂରଣ ଦାବିରେ ବଲାଙ୍ଗିର ପାଟଣାଗଡ଼ ୫୫ ନମ୍ବର ଜାତୀୟ ରାଜପଥ ବାନ୍ଧନବାଡି ଛକରେ ରାସ୍ତା ରୋକ କରାଯାଇଛି । ଖବର ପାଇ ପାଟଣାଗଡ଼ ଥାନା ଅଧିକାରୀ ଅନନ୍ତ ପ୍ରଧାନ ଓ ତହସିଦାର ଲକ୍ଷଣ ମାଝୀ ଘଟଣାସ୍ଥଳକୁ ପହଁଞ୍ଚି ଆନ୍ଦୋଳନକାରୀଙ୍କ ସହ ଆଲୋଚନା କରିଥିଲେ । ଏବଂ ରେଡ଼ କ୍ରସ ତରଫରୁ ମୃତକ ପରିବାରଙ୍କୁ ୨୦ ହଜାର ଟଙ୍କା ପ୍ରଦାନ କରିବା ପରେ ରାସ୍ତାରୋକ ହଟିଥିଲା । ଘଟଣା ଅନୁସାରେ, ଗତକାଲି ମୋଟର ସାଇକେଲ ଶିରିଜ ଦୁର୍ଘଟଣାରେ ୬୦ ବର୍ଷୀୟ ବୃଦ୍ଧ ପୂର୍ଣ ପୁଟେଲଙ୍କ ମୃତ୍ୟ ହୋଇଥିଲା । ତାଙ୍କ ସହ ୪ ଗୁରୁତରଙ୍କୁ ବଲାଙ୍ଗିର ଭୀମଭୋଇ ମେଡ଼ିକାଲରେ ଭର୍ତ୍ତି କରାଯାଇଥିଲା ।
ପୂର୍ଣ ପୁଟେଲ ବାନ୍ଧନବାଡ଼ି ରାସ୍ତାକଡରେ ଛିଡ଼ା ହୋଇଥିଲା ବେଳେ ବଲାଙ୍ଗିର ପଟୁ ପାଟଣାଗଡ଼ ଆସୁଥିବା ଏକ ମୋଟର ସାଇକେଲ ଧକ୍କା ଦେଇଥିଲା । ଆଉ ଦୁଇ ଜଣ ଉଦ୍ଧାର କରୁଥିବା ବେଳେ ଆଉ ଏକ ବାଇକ ଆସି ସେମାନଙ୍କୁ ମଧ୍ୟ ଧକ୍କା ଦେଇଥିଲା । ଗୁରୁତର ପାଞ୍ଚ ଜଣଙ୍କୁ ବଲାଙ୍ଗିର ନେଉଥିବା ବେଳେ ରାସ୍ତାରେ ପୂର୍ଣ୍ଣ ପୁଟେଲଙ୍କ ମୃତ୍ୟୁ ହୋଇଥିଲା। ଘଟଣା ନେଇ ସେଠାରେ ଉତ୍ତେଜନା ପ୍ରକାଶ ପାଇଥିଲା। ପରେ ପାଟଣାଗଡ଼ ପୋଲିସ ପହଞ୍ଚି ଲୋକଙ୍କ ସହ ଆଲୋଚନା କରିବା । ପରେ ଉତ୍ତେଜନା ଶାନ୍ତ ହୋଇଥିଲା।