ଡିଜିପିଙ୍କ ମାଲକାନଗିରି ଗସ୍ତ, ମାଓ ଦମନ ଦିଗରେ ସ୍ୱତନ୍ତ୍ର ରଣନୀତି

ମାଲକାନଗିରି (ବଡ଼ ଖବର ବ୍ୟୁରୋ): ଲାଲଗଡ଼ରୁ ମାଓବାଦୀଙ୍କୁ ସମୂଳେ ବିନାଶ କରିବା ପାଇଁ ଅଣ୍ଟା ଭିଡ଼ିଛନ୍ତି ରାଜ୍ୟ ସରକାର । ଏଥିପାଇଁ ବିଭିନ୍ନ ରଣକୌଶଳ ମଧ୍ୟ ଆପଣାଇଛନ୍ତି । ଏହାକୁ ଦୃଷ୍ଟିରେ ରଖି ମାଲକାନଗିରି ଗସ୍ତ କରିଛନ୍ତି ପୋଲିସ ଡିଜି ଅଭୟ । ପ୍ରଥମେ ଚିତ୍ରକୋଣ୍ଡା ସ୍ୱାଭିମାନ ଅଞ୍ଚଳର ଗୋରାସେତୁଠାରେ ପହଞ୍ଚି ନୂତନ ଭାବେ ସ୍ଥାପନ ହୋଇଥିବା ବିଏସଏଫ୍ କ୍ୟାମ୍ପର ସୁରକ୍ଷା ବ୍ୟବସ୍ଥା ସମୀକ୍ଷା କରିଛନ୍ତି । କ୍ୟାମ୍ପକୁ ବିରୋଧ କରୁଥିବା ଆଦିବାସୀ ଲୋକଙ୍କ ସହ ଅଭୟ କଥା ହୋଇଛନ୍ତି । ବିଏସଏଫ୍ ବାହିନୀ ସେଠାରେ ପହଞ୍ଚିବା ପରେ ଉନ୍ନୟନ କାର୍ଯ୍ୟ ଆରମ୍ଭ ହେବ ବୋଲି ପ୍ରତିଶ୍ରୃତି ଦେଇଥିଲେ ଅଭୟ । ଆଗାମୀ ଦିନରେ ନକ୍ସଲଙ୍କ କାର୍ଯ୍ୟକଳାପକୁ କିପରି ଦମନ କରାଯାଇପାରିବ ସେ ବିଷୟରେ ଆଲୋଚନା କରିବା ସହ ଅଞ୍ଚଳର ଲୋକଙ୍କୁ କିଭଳି ସୁରକ୍ଷା ଦିଆଯିବ ସେ ଦିଗରେ ରଣନୀତି ପ୍ରସ୍ତୁତ କରାଯାଇଥିବା କହିଥିଲେ ।

ଏହାସହ ଅଞ୍ଚଳର ବିକାଶ ଦିଗରେ ଦୃଷ୍ଟି ଦେଇଛନ୍ତି ଅଭୟ । କାର୍ଯ୍ୟକ୍ରମରେ ଗୁଇନ୍ଦା ନିର୍ଦ୍ଦେଶକ ଆର୍.କେ. ଶର୍ମା, ଆଇଜି (ଅପରେସନ) ଅମିତାଭ ଠାକୁର, ବିଏସଏଫ୍ ଆଇଜି ଏମ.ଏସ ଶର୍ମା, ଦକ୍ଷିଣ ପଶ୍ଚିମାଞ୍ଚଳ ଡିଆଇଜି ସଫିମ୍ ଅହମ୍ମଦ ଖାନ କେ ଏବଂ ମାଲକାନଗିରି ଏସପି ଉପସ୍ଥିତ ଥିଲେ । ସେପଟେ ବାୟୁସେନାର ଏକ ଲଢୁଆ ବିମାନ ଗତକାଲି ଚିତ୍ରକୋଣ୍ଡା ବ୍ଲକ ସ୍ୱାଭିମାନ ଅଞ୍ଚଳ ଗୋରାସେତୁଠାରେ ଆକାଶ ମାର୍ଗରୁ ସୁରକ୍ଷା ଯାଞ୍ଚ କରିବା ସହ ମାଓବାଦୀଙ୍କ ଗତିବିଧି ଉପରେ ନଜର ରଖିଥିଲା ।