ମୋଦୀ କ୍ଷମତାସୀନ ହେବେ ବୋଲି ଭ୍ରମରେ ରୁହନ୍ତୁ ନାହିଁ: ପିକେ
ନୂଆଦିଲ୍ଲୀ(ବଡ଼ ଖବର ବ୍ୟୁରୋ): ନିର୍ବାଚନ ରଣନୀତିଜ୍ଞ ତଥା ଭାରତୀୟ ରାଜନୈତିକ କାର୍ଯ୍ୟ କମିଟିର ମୁଖ୍ୟ ପ୍ରଶାନ୍ତ କିଶୋର ପୁଣିଥରେ ନିଜ ବୟାନକୁ ନେଇ ଚର୍ଚ୍ଚାରେ ରହିଛନ୍ତି । ଏଥର କଂଗ୍ରେସ କିମ୍ବା ରାହୁଲ ଗାନ୍ଧୀଙ୍କୁ ନେଇ ନୁହେଁ ବରଂ ଶାସକ ଦଳ ବିଷୟରେ କହି ଲାଇମ ଲାଇଟରେ ରହିଛନ୍ତି । ସେପଟେ ପ୍ରଶାନ୍ତ ଜାତୀୟ କଂଗ୍ରେସରେ ମିଶିବେ ବୋଲି ଅନେକ କଳ୍ପନାଜଳ୍ପନା ଚାଲିଥିଲା । ହେଲେ ପ୍ରଧାନମନ୍ତ୍ରୀଙ୍କ ଗୁଣଗାନ କରିବା ପରେ ପୁଣିଥିରେ ପିକେ କେଉଁ ଦଳରେ ମିଶିବେ ତାକୁ ନେଇ ଦ୍ୱନ୍ଦ ସୃଷ୍ଟି ହୋଇଛି । ଏହା ମଧ୍ୟରେ ଭାରତୀୟ ଜନତା ପାର୍ଟି ଆଗାମୀ ଦଶନ୍ଧି ଧରି ରାଜନୀତିରେ ଏକ ଶକ୍ତିଶାଳୀ ଶକ୍ତି ହୋଇ ରହିବ ବୋଲି ପ୍ରଶାନ୍ତ ସ୍ପଷ୍ଟ କରିଛନ୍ତି । ଏ ଖବର ସାମ୍ନାକୁ ଆସିବା ପରେ ସାରା ଦେଶର ରାଜନୈତିକ ମାହୋଲ ବେଶ ଚଳଚଞ୍ଚଳ ହୋଇ ଉଠିଛି । କେବଳ ଏତିକି ନୁହେଁ ବରଂ ୪୦ ବର୍ଷ ପୂର୍ବେ କଂଗ୍ରେସ ଯେପରି କ୍ଷମତାର କେନ୍ଦ୍ର ଥିଲା ।
ସେହିଭଳି ବିଜେପି ମଧ୍ୟ କ୍ଷମତାର କେନ୍ଦ୍ର ରହିବ । ବିପେଜି ନିର୍ବାଚନ ଜିତୁ କିମ୍ବା ହାରୁ । କଂଗ୍ରେସ ଏବଂ ଅନ୍ୟ ଦଳମାନଙ୍କୁ ଅନେକ ଦଶନ୍ଧି ଧରି ବିଜେପି ସହିତ ଲଢିବାକୁ ପଡ଼ିବ ବୋଲି ନିର୍ବାଚନ ରଣନୀତିଜ୍ଞ ପ୍ରଶାନ୍ତ କିଶୋର କହିଛନ୍ତି । ଅନ୍ୟପଟେ କଂଗ୍ରେସ ସାଂସଦ ତଥା ତାଙ୍କ ମିତ୍ର ରାହୁଲ ଗାନ୍ଧୀଙ୍କୁ ସମାଲୋଚନା କରିବା ପାଇଁ ମଧ୍ୟ ପଛେଇ ନାହାଁନ୍ତି । ତେବେ ରାହୁଲ ଗାନ୍ଧୀ ଯାହା ଭାବୁଛନ୍ତି ତାହା ଘଟିବ ନାହିଁ । ବୋଧହୁଏ ସେମାନେ ଭାବୁଛନ୍ତି ଯେ କିଛି ସମୟ ମଧ୍ୟରେ ଲୋକମାନେ ନରେନ୍ଦ୍ର ମୋଦିଙ୍କୁ ହଟାଇବାରେ ସକ୍ଷମ ହେବେ । କିନ୍ତୁ ତାହା ଏତେ ସହଜ ନୁହେଁ । ଯଦି ଆପଣ ମୋଦିଙ୍କ ଶକ୍ତି ବିଷୟରେ ଧାରଣା ନ ପାଆନ୍ତି ତାହାଲେ ଆପଣ ତାଙ୍କୁ ପରାସ୍ତ କେବେ ବି କରିପାରିବେ ନାହିଁ ବୋଲି ପ୍ରଶାନ୍ତ ସ୍ପଷ୍ଟ କରିଛନ୍ତି ।
