ହାତୀ ଟ୍ରାଜେଡି: ନିଖୋଜ ଓଡ୍ରାଫ ସଦସ୍ୟଙ୍କ ମିଳୁନି ପତ୍ତା
ଭୁବନେଶ୍ୱର(ବଡ଼ ଖବର ବ୍ୟୁରୋ): ମହାନଦୀର ମୁଣ୍ଡଳୀ ବ୍ୟାରେଜରେ ଫସିଥିବା ହାତୀକୁ ରକ୍ଷା କରିବା ପାଇଁ ଆରମ୍ଭ ହୋଇଥିଲା ଅପରେସନ ଗଜରାଜ । ଏହି ଅପରେସନ ସମୟରେ ଯୁବ ସାମ୍ବାଦିକ ଅରିନ୍ଦମ ଦାସଙ୍କ ମୃତ୍ୟୁ ହୋଇଥିଲାବେଳେ ନିଖୋଜ ଥିବା ଓଡ୍ରାଫ ଟିମର ଜଣେ ବରିଷ୍ଠ ଡାଇଭର ସୀତାରାମ ମୁର୍ମୁଙ୍କ ପତ୍ତା ମିଳୁନି ।
ଏନେଇ ୩ଟି ଓଡ୍ରାଫ ଟିମ ଖୋଜାଖୋଜି ଆରମ୍ଭ କରିଥିବାର କଥା ସାମ୍ନାକୁ ଆସିଛି । ଅନ୍ୟପଟେ ଫସିରହିଥିବା ହାତୀକୁ କୂଳ ଆଡକୁ ଘଉଡ଼େଇବା ଉଦ୍ଦେଶ୍ୟରେ ଓଡ୍ରାଫ ଟିମର ପାଞ୍ଚ ଜଣ ସଦସ୍ୟ ଏବଂ ଓଟିଭିର ସାମ୍ବାଦିକ ଅରିନ୍ଦମ ଦାସ ଓ ପ୍ରଭାତ ସିହ୍ନା ନଈ ଭିତରକୁ ଓହ୍ଲାଇଥିଲେ ।
କିନ୍ତୁ ପ୍ରଖର ସ୍ରୋତରେ ତାଙ୍କର ବୋଟଟି ଭାସିଯାଇଥିଲା । ବ୍ୟାରେଜ ପୋଲ ଉପରୁ ରଶି ଓ ରୋପ ଲାଡର ଲଗାଇ ଏବଂ ସ୍ଥାନୀୟ ମତ୍ସଜୀବୀ ହୁଲି ଡ଼ଙ୍ଗାରେ ଯାଇ ସେମାନଙ୍କୁ ଉଦ୍ଧାର କରିଥିଲେ । ତେବେ ଓଡ୍ରାଫର ରୁଦ୍ର ପ୍ରଧାନ ସ୍ୱାଭାବିକ ଥିବାବେଳେ ଏଥିରେ ଗୁରୁତର ହୋଇପଡିଥିବା ସାମ୍ବାଦିକ ଅରିନ୍ଦମ ଦାସ, ପ୍ରଭାତ ସିହ୍ନା, ଓଡ୍ରାଫର ଆନନ୍ଦ ପାଲ, ହରିଶ ନାୟକ, ନିବାରଣ ଦଳେଇଙ୍କୁ କଟକ ବଡ଼ ଡାକ୍ତରଖାନାକୁ ନିଆଯାଇଥିଲା । ସେଠାରେ ଅରିନ୍ଦମଙ୍କୁ ଡାକ୍ତର ମୃତ ଘୋଷଣା କରିଥିଲେ । ଏଖବର ସାମ୍ନାକୁ ଆସିବା ପରେ ସାରା ଓଡିଶା ସ୍ତବ୍ଧ ହୋଇପଡ଼ିଥିଲା । ବାସ୍ତବରେ ଅପରେସନ ଗଜରାଜ ଫଳରେ ଓଡ଼ିଶା ଜଣେ ନିର୍ଭୀକ ସାମ୍ବାଦିକଙ୍କୁ ହରାଇଛି ।