ବନ୍ୟା ଆଶଙ୍କା, ଭୟରେ ଅଞ୍ଚଳବାସୀ

ବସ୍ତା (ବଡ଼ ଖବର ବ୍ୟୁରୋ): ବସ୍ତା ପାଇଁ ଭୟଙ୍କର ବୀପଦ ଆଣୁଛି ଜଳକା ନଦୀବନ୍ଧ । ବିପଦ ସଂକେତ ଉପରେ ପ୍ରବାହିତ ହେଉଛି ଜଳକା ନଦୀ ର ଜଳସ୍ତର । ନଦୀର ମଥାନୀ ଠାରେ ବିପଦ ସଂକେତ ୫.୫୦ ମିଟର ଥିବା ବେଳେ ସକାଳ ୭ ଟା ସୁଦ୍ଧା ଜଳସ୍ତର ବୃଦ୍ଧି ପାଇ ୬.୨୧ ମିଟରରେ ପ୍ରବାହିତ ହେଉଛି । ବିଭିନ୍ନ ସ୍ଥାନରେ ନଦୀବନ୍ଧ ଦୁର୍ବଳ ଥିବାରୁ ବନ୍ୟା ଆଶଙ୍କାରେ ଭୟଭୀତ ନଦୀ ତଟବର୍ତ୍ତୀ ଅଞ୍ଚଳ ବାସୀ । ଜଳକା ନଦୀର ଉପର ମୁଣ୍ଡ ମୟୁରଭଞ୍ଜ ଜିଲ୍ଲାର ଶୁଳିଆପଦା, ମୋରଡା, ଚିତ୍ରଡା, ରାସଗୋବିନ୍ଦପୁର ଅଞ୍ଚଳରେ ପ୍ରବଳ ବର୍ଷା କାରଣରୁ ବଢୁଛି ନଦୀର ଜଳସ୍ତର ।

ନଦୀ ବନ୍ଧ ଦୁର୍ବଳ ଥିବାରୁ ଏହାର ସ୍ଥାୟୀ ପ୍ରତିକାର ପାଇଁ ସ୍ଥାନୀୟ ଲୋକେ ବାରମ୍ବାର ଦାବି କରୁଥିଲେ । ଲୋକଙ୍କ ଆବଶ୍ୟକତାକୁ ଦୃଷ୍ଟିରେ ରଖି ଜଳେସେଚନ ବିଭାଗ ପକ୍ଷରୁ ୫ କୋଟି ଟଙ୍କା ଅଟକଳ ମୁଲ୍ୟରେ ୩ କିଲୋମିଟର ନଦୀବନ୍ଧ ନିର୍ମାଣ କରାଯାଇଥିଲା । ଏହା ୩ ମାସ ତଳେ ନିର୍ମାଣ କାର୍ଯ୍ୟ ସରିଥିଲେ ମଧ୍ୟ ନଦୀରେ ସାମାନ୍ୟ ପାଣି ଆସିବାରୁ ବନ୍ଧ ସମ୍ପୁର୍ଣ୍ଣ ଭାଙ୍ଗିବାକୁ ବସିଲାଣି । ଯାହା ପାଇଁ ଭୟଭୀତ ୫୦ ରୁ ଉର୍ଦ୍ଧ୍ବ ଗାଁ ।