ଲୁଗା ବ୍ୟବସାୟୀଙ୍କ ଘରେ ନିଆଁ

ବଡ଼ବିଲ (ବଡ଼ ଖବର ବ୍ୟୁରୋ): ବଡ଼ବିଲ ମ୍ୟୁନିସିପାଲଟି ୬ ନଂ ୱାର୍ଡ଼, ମନି ଟାୱାର ନିକଟରେ ବ୍ୟବସାୟୀଙ୍କ ଘରେ ଅଗ୍ନିକାଣ୍ଡ । ସହରର ଜଣାଶୁଣା ବ୍ୟବସାୟୀ ପରିୱାର କ୍ଲୋଥ୍ ଷ୍ଟୋରର ମାଲିକ ରୋହତାଶ ଅଗ୍ରୱାଲଙ୍କ ଘରେ ଏହି ଅଗ୍ନିକାଣ୍ଡ ଘଟିଛି । ଆଜି ଭୋର୍ ପ୍ରାୟ ୪ ଟା ସମୟରେ ନିଆଁ ଲାଗିଥିବା କୁହାଯାଉଛି । ଘରର ପଛପଟ ଅଗଣାରେ ରହିଥିବା ତୁଳା ଗୋଦାମରୁ ଏହି ନିଆଁ ଲାଗିଥିବା ଅନୁମାନ କରାଯାଉଛି । ଷ୍ଟକ୍ ରହିଥିବା ସମସ୍ତ ତୁଳା ପୋଡ଼ି ଯିବା ସହିତ ଅଫିସ୍ ଷ୍ଟେସନାରୀ ରଖାଯାଇଥିବା ଦୁଇଟି ରୁମକୁ ନିଆଁ ବ୍ୟାପି ଯାଇଥିଲା ।

ଯାହା ଫଳରେ ଲକ୍ଷାଧିକ ଟଙ୍କାର ସମ୍ପତ୍ତି ପୋଡ଼ି ପାଉଁଶ ହୋଇଯାଇଛି । ଅଗ୍ନିକାଣ୍ଡ ଘଟିଥିବା ଜଣାପଡ଼ିବା ପରେ ନିକଟସ୍ଥ ସମସ୍ତ ସରକାରୀ ଓ ଘୋରୋଇ ଦମକଳ ବିଭାଗକୁ ଖବର ଦିଆଯାଇଥିଲା । ଖବର ପାଇ ବଡ଼ବିଲ ଓ ଯୋଡ଼ା ବିଲେଇ ପଦାର ସରକାରୀ ଦମକଳ ଏବଂ ଦୁଇଟି ଘରୋଇ ଖଣି କମ୍ପାନୀର ଦମକଳ ଏହିପରି ୪ ଟି ଦମକଳ ବାହିନୀ ଆସି ନିଆଁକୁ ଆୟତ୍ତ କରିଥିଲେ । ଯାହା ଫଳରେ ନିଆଁ ଆଉ ଅଧିକ ବ୍ୟାପି ପାରି ନଥିଲା । ତେବେ ଏହି ଅଗ୍ନିକାଣ୍ଡ କିପରି ଘଟିଲା ତାହା ଅସ୍ପଷ୍ଟ ରହିଛି ।