ଦୁର୍ଘଟଣାରେ ପୂର୍ବତନ ସରପଞ୍ଚଙ୍କ ମୃତ୍ୟୁ
ଆସ୍କା(ବଡ଼ ଖବର ବ୍ୟୁରୋ): ଗଞ୍ଜାମ ଜିଲ୍ଲା ଆସିକା କୋଟିନଡା ଥାନା ଅନ୍ତର୍ଗତ ଡିପଲ ସ୍କୁଲ ଟିକଟରେ ଏକ ମର୍ମନ୍ତୁଦ ଦୁର୍ଘଟଣା ଘଟିଛି । ଦୁର୍ଘଟଣାରେ ଆସିକା ବ୍ଲକ ବରଗାଁ ପଞ୍ଚାୟତର ପୂର୍ବତନ ସରପଞ୍ଚ ଲଲାଟ ବେହେରାର ମୃତ୍ୟୁ ହୋଇଛି । ସେ କୌଣସି ନିର୍ମାଣ କାର୍ଯ୍ୟ ପାଇଁ ପାଇପ କିଣିବାକୁ ନିଜ ବାଇକ ଯୋଗେ କଲେଜ ଛକକୁ ଯାଉଥିଲେ ।
ତାଙ୍କ ପଛପଟୁ ଏକ ଧଳା ରଙ୍ଗର ବୋଲେରୋ ଗାଡି ଦ୍ରୁତ ଗତିରେ ଆସି ମାଡି ଯାଇଥିଲା । ଵୋଲେରୋ ଗାଡି ତାଙ୍କୁ କିଛି ଦୂର ଘୋଷାଡି ଘୋଷାଡି ନେଇଥିଲା । ଏହି ଦୁର୍ଘଟଣାରେ ତାଙ୍କ ମୁଣ୍ଡକୁ ଗଭୀର ଆଘାତ ହୋଇଥିଲା । ଗୁରୁତର ଅଵସ୍ଥାରେ ସେ ରାସ୍ତା କଡରେ ପଡିରହିଥିଲେ । ସ୍ଥାନୀୟ ଲୋକେ ତାଙ୍କୁ ଆସିକା ସବଡିଭିଜନ ମେଡିକାଲକୁ ଆଣିଥିଲେ । ଆସିକା ମେଡିକାଲ ଠାରେ କାର୍ୟ୍ୟରତ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ସେପଟେ ଦୁର୍ଘଟଣା ଘଟାଇଥିବା ବୋଲେରୋ ଗାଡି ଘଟଣା ସ୍ଥଳରୁ ଚମ୍ପଟ ମାରିଥିବା ଜଣାପଡିଛି ।
ପୂର୍ବତନ ସରପଞ୍ଚଙ୍କ ମୃତ୍ୟୁ ଖବର ଜଣାପଡବା ପରେ ଆସିକା ମେଡିକାଲଠାରେ ଲୋକାରଣ୍ୟ ହୋଇଥିଲା । ସେ ୨୦୦୭ ମସିହାରେ ବରଗାଁ ପଞ୍ଚାୟତରେ ସରପଞ୍ଚ ରୁପେ ନିର୍ବାଚିତ ହୋଇଥିଲେ । ଖବର ପାଇ କୋଟିନଡା ଥାନା ଅଧିକାରୀ ଘଟଣା ସ୍ଥଳରେ ପହଞ୍ଚି ତଦନ୍ତ କାର୍ୟ୍ୟ ଆରମ୍ଭ କରିଥିବା ଜଣାଯାଇଛି ।