ଦିଲ୍ଲୀ, (ବଡ଼ ଖବର ବ୍ୟୁରୋ) : କରୋନା ମହାମାରୀ ସମୟରେ ଚାଲିଥିବା ଏବଂ ଭବିଷ୍ୟତରେ ହେବାକୁ ଥିବା ନିର୍ବାଚନ ପାଇଁ ତାରକା ପ୍ରଚାରକମାନଙ୍କ ମାନଦଣ୍ଡକୁ ନିର୍ବାଚନ ଆୟୋଗ ସଂଶୋଧନ କରିଛନ୍ତି । ମହାମାରୀ ସମୟରେ ସ୍ୱୀକୃତିପ୍ରାପ୍ତ ଜାତୀୟ ଓ ରାଜ୍ୟ ରାଜନୈତିକ ଦଳଗୁଡିକ ପାଇଁ ସର୍ବାଧିକ ୩୦ ତାରକା ପ୍ରଚାରକ ଏବଂ ଅଣ-ସ୍ୱୀକୃତିପ୍ରାପ୍ତ ପଞ୍ଜୀକୃତ ରାଜନୈତିକ ଦଳଗୁଡିକ ପାଇଁ ୧୫ ତାରକା ପ୍ରଚାରକଙ୍କୁ ସ୍ଥିର କରାଯାଇଛି। ନିର୍ବାଚନ ସମୟରେ ଦଳମାନେ ଫିଲ୍ମ କଳାକାରଙ୍କଠାରୁ ଆରମ୍ଭ କରି ଅନ୍ୟ କ୍ଷେତ୍ରରୁ ସେଲିବ୍ରିଟିମାନଙ୍କୁ ଷ୍ଟାର ପ୍ରଚାରକ ଭାବରେ ନେଇଆସୁଛନ୍ତି । କରୋନାକୁ ଦୃଷ୍ଟିରେ ରଖି ନିର୍ବାଚନ ଆୟୋଗ ବର୍ତ୍ତମାନ ଏହି ନୂତନ ନିୟମ ଜାରି କରିଛନ୍ତି । ଏହାପୂର୍ବରୁ ଅଗଷ୍ଟ ୨୧ରେ ଆୟୋଗ ‘କରୋନା ଯୁଗରେ’ ନିର୍ବାଚନ କରିବା ପାଇଁ ବିସ୍ତୃତ ନିର୍ଦ୍ଦେଶାବଳୀ ଜାରି କରିଥିଲା। ବିହାର ବିଧାନସଭା ନିର୍ବାଚନ ଏବଂ ଅନ୍ୟାନ୍ୟ ଉପ-ନିର୍ବାଚନ ପାଇଁ ଏହି ନିର୍ଦ୍ଦେଶାବଳୀ ଜାରି କରାଯାଇଛି । ବର୍ତ୍ତମାନ ପ୍ରାର୍ଥୀଙ୍କ ସମେତ କେବଳ ପାଞ୍ଚଜଣ ଲୋକ ଘର ଘର ବୁଲି ପ୍ରଚାର ଅଭିଯାନରେ ଅଂଶଗ୍ରହଣ କରିପାରିବେ। ପ୍ରାର୍ଥୀମାନେ ନାମାଙ୍କନ ପତ୍ର ଓ ତତ୍ଜନିତ ଟଙ୍କା ଅନଲାଇନରେ ଦାଖଲ କରିପାରିବେ । ଗୃହ ମନ୍ତ୍ରଣାଳୟ ଏବଂ ରାଜ୍ୟଗୁଡିକର କରୋନା ଉପରେ ଥିବା ନିର୍ଦ୍ଦେଶାବଳୀ ଅନୁଯାୟୀ ସାଧାରଣ ସଭା ଏବଂ ରୋଡ୍ ସୋକୁ ଅନୁମତି ଦିଆଯିବ।
