‘ନବୀନଙ୍କୁ ଭାରତ ରତ୍ନ ଦିଅ’
ଦେବଗଡ଼ (ବଡ଼ ଖବର ବ୍ୟୁରୋ): ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ‘ଭାରତ ରତ୍ନ’ ପାଇଁ ସୋସିଆଲ ଏଣ୍ଡ କଲଚରାଲ ଏଡ଼ଭାନ୍ସ ନେଟୱର୍କ (ସ୍କାନ ) ପକ୍ଷରୁ ସମ୍ବଲପୁରରୁ ଆରମ୍ଭ ହୋଇଥିବା ରାଜ୍ୟ ବ୍ୟାପୀ ଦସ୍ତଖତ ଅଭିଯାନ ଆଜି ଦେବଗଡ଼ରେ ପହଞ୍ଚିଥିଲା । ଏହି ଅବସରରେ ସ୍ଥାନୀୟ ମୁନସିପାଲିଟି ଛକରେ ଏକ ପଥପ୍ରାନ୍ତ ସଭା ଅନୁଷ୍ଠିତ ହୋଇଥିଲା ।
ଏହି ପଥପ୍ରାନ୍ତ ସଭାରେ ଇଂ. ଚିତ୍ତ ରଞ୍ଜନ ପ୍ରଧାନ, ଇଂ ସୁଜିତ ପ୍ରଧାନ, ଯୁବ ନେତା ସୁକଦେବ ଭଞ୍ଜ, ପ୍ରତାପ ଦେବ, ରୂପକ ମାଝୀ, ମନୋଜ ଆଚାର୍ଯ୍ୟ, ଶରତ ମେହେର, ଅଞ୍ଜନ ପ୍ରଧାନ, ଶନି ଦେବ ପ୍ରମୁଖ ସାମିଲଥିଲେ । ଦେବଗଡ଼ ମୁନସିପାଲିଟି ଅଂଚଳର ସମସ୍ତ ୧୧ ଟି ୱାର୍ଡରେ ଏହି ଦସ୍ତଖତ ଅଭିଯାନକୁ ବ୍ୟାପକ କରିବା ପାଇଁ ସ୍ଥିର ହୋଇଥିଲା ।
ସଭା ପ୍ରାରମ୍ଭରେ ସୋସିଆଲ ଏଣ୍ଡ କଲଚରାଲ ଏଡ଼ଭାନ୍ସ ନେଟୱର୍କ ଅଧ୍ୟକ୍ଷ ତଥା ରାଜ୍ୟ ଆବାହକ ସୁଧାଂଶୁ ମହାରଣା ଦସ୍ତଖତ ଅଭିଯାନର ଉଦ୍ଦେଶ୍ୟ ଓ ଆଭିମୁଖ୍ୟ ସମ୍ପର୍କରେ ସୂଚନା ପ୍ରଦାନ କରିଥିଲେ । ରାଜ୍ୟ ସଂଯୋଜକ ସରୋଜ ସାହୁ ଏହି ଦସ୍ତଖତ ଅଭିଯାନରେ ଦେବଗଡ଼ବାସୀ ବିପୁଳ ସମର୍ଥନ କରିଥିବାରୁ କୃତଜ୍ଞତା ଜ୍ଞାପନ କରିଥିଲେ ।