ବାଲେଶ୍ୱର (ବଡ଼ ଖବର ବ୍ୟୁରୋ): ଅଜଣା ଗାଡ଼ି ଧକ୍କାରେ ଚାଲି ଗଲା ସ୍ୱାମୀ ଜୀବନ । ବେସାହାରା ହୋଇଗଲେ ଦୃଷ୍ଟିବାଧିତ ସ୍ତ୍ରୀ ସହ ୬ ପିଲାଛୁଆ । ଗାଁକୁ ଶବ ନେବା ପାଇଁ ସ୍ତ୍ରୀ ଓ ପିଲା ମହାପ୍ରଣାୟନ ଗାଡ଼ିକୁ ଜଗି ବସିଛନ୍ତି । ଏଭଳି ଦୁଃଖ ଦାୟକ ଘଟଣା ଦେଖିବାକୁ ମିଳିଛି ବାଲେଶ୍ବର ଫକୀରମୋହନ ମେଡିକାଲ କଲେଜ୍ ଓ ହସ୍ପିଟାଲରେ । ସୋର ବାଳିବାଡ ଗାଁର ଦେବେନ୍ଦ୍ର ଜେନା ଦୃଷ୍ଟିବାଧିତ ସ୍ତ୍ରୀ ସବିତା ସହ ୬ଜଣ ପିଲାକୁ ଧରି ଗାଁରେ ମାଗିଯାଚି ଚଳୁଥିଲେ ।
ସବିତା ଦୃଷ୍ଟି ଶକ୍ତି ହରାଇଥିବାବେଳେ ଛଅ ପିଲାଙ୍କ ମଧ୍ୟରୁ ଚାରି ପିଲା ଜନ୍ମରୁ ଆଖିରେ ସଠିକ୍ ଭାବେ ଦେଖିପାରନ୍ତି ନାହିଁ । ଗତକାଲି ସୋର ବଳିବାଡ ଗାଁ ନିକଟରେ ଅଜଣା ଗାଡ଼ି ଦେବେନ୍ଦ୍ରକୁ ଧକ୍କା ମାରି ପଲାଇଥିଲା । ଗୁରୁତର ଅବସ୍ଥାରେ ସ୍ଥାନୀୟ ଲୋକେ ପ୍ରଥମେ ସୋର ମେଡିକାଲ ଆଣିଥିଲେ । ସେଠାରେ ତାଙ୍କର ଅବସ୍ଥା ଅଧିକ ଖରାପ ହେବାରୁ ତାଙ୍କୁ ବାଲେଶ୍ବର ସ୍ଥାନାନ୍ତର କରାଯାଇଥିଲା । ବାଲେଶ୍ବର ମେଡିକାଲ ପହଞ୍ଚିବା ପରେ ଡାକ୍ତର ତାକୁ ମୃତ୍ୟୁ ଘୋଷଣା କରିଥିଲେ ।
