ପ୍ରେମିକ ସାଜିଲା ସଇତାନ
ଜଗତସିଂହପୁର (ବଡ଼ ଖବର ବ୍ୟୁରୋ): କାଠିଆପଡ଼ା ଗାଁ ନିକଟସ୍ଥ ବିଲରେ ଅର୍ଦ୍ଧ ଉଲଗ୍ନ ଅବସ୍ଥାରେ ଯୁବତୀଙ୍କ ମତୃଦେହ ମିଳିବା ଘଟଣା । ହତ୍ୟାକାରୀକୁ ସନ୍ଧାନ ଲଗାଇବାରେ ସଫଳ ହୋଇଛି ଜଗତସିଂହପୁର ପୁଲିସ । ଅଭିଯୁକ୍ତ ପପୁକୁ ଝାଡ଼ଖଣ୍ଡର ଜାମସେଦପୁରରୁ ଉଠାଇ ଆଣିଛି ସ୍ପେଶାଲ୍ ସ୍କାଡ୍ । ଅଭିଯୁକ୍ତର ଘର ଜଗତସିଂହପୁର ଜିଲ୍ଲାରେ ବୋଲି ଜଣାପଡ଼ିଛି । ଯୁବତୀଙ୍କ ସହିତ ତାଙ୍କର ପ୍ରେମ ସମ୍ପର୍କ ଥିବା ବୋଲି କୁହାଯାଉଛି । ପୁଲିସ ଅଭିଯୁକ୍ତକୁ ଅଧିକ ପଚରାଉଚରା କରୁଥିବା ବେଳେ ସିନ୍ ରିକ୍ରିଏସନ ପାଇଁ ପ୍ରସ୍ତୁତ ହେଉଛି ।
ଯୁବତୀଙ୍କର ଅନ୍ୟ ଜଣେ ଯୁବକଙ୍କ ସହିତ ନିର୍ବଦ୍ଧ ହେବା ପରେ ରକ୍ତମୁଖା ହୋଇଥିଲା ପ୍ରେମିକ । ପ୍ରେମିକାକୁ ଘରୁ ଡାକିନେଇ ମୁଗ ବିଲରେ ଅତି ନିର୍ମମ ଭାବେ ହତ୍ୟା କରିଥିବା ଅଭିଯୋଗ ହୋଇଛି । ମୃତ ଯୁବତୀଙ୍କ ୧୯ ତାରିଖରେ ନିର୍ବନ୍ଧ ହୋଇଥିଲା । ସେ ୨୦ ତାରିଖରେ ମାମୁଁ ଘରୁ ଫେରିଥିଲେ । ତେବେ ସଂଧ୍ୟାରେ ତାଙ୍କୁ କେହି ଘରୁ ଡାକି ନେଇଥିଲେ । ଏହାପରେ ଯୁବତୀ ଜଣଙ୍କ ଆଉ ଘରକୁ ଫେରିନଥିଲେ । ପରିବାର ଲୋକ ଖୋଜାଖୋଜି କରିଥିଲେ, ହେଲେ ପାଇନଥିଲେ ।
ପରଦିନ କାଠିଆପଡ଼ା ଗାଁ ନିକଟସ୍ଥ ବିଲରୁ ଯୁବତୀଙ୍କ ମୃତଦେହ ଅର୍ଦ୍ଧ ଉଲଗ୍ନ ଅବସ୍ଥାରେ ମିଳିଥିଲା । ପୁଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ଜବତ କରିବା ସହିତ ତଦନ୍ତ ଆରମ୍ଭ କରିଥିଲେ । ତେବେ ବୁଧବାର ଜଗତସିଂହପୁର ପୁଲିସର ସ୍ପେଶାଲ ସ୍କାଡ୍ ଅଭିଯୁକ୍ତ ପ୍ରେମିକକୁ ଝାଡ଼ଖଣ୍ଡରୁ ଗିରଫ କରିଛି । ପୁଲିସ ଏହି ଘଟଣାରେ ଅନ୍ୟ କିଏ ସମ୍ପୃକ୍ତ ଅଛନ୍ତି କି ନାହିଁ ଅଧିକ ପଚରାଉଚରା କରୁଛି । ଅନ୍ୟପଟେ ଆଜି ଘଟଣାର ସିନ୍ ରିକ୍ରିଏସନ ହେବ ବୋଲି ଜଣାପଡ଼ିଛି ।