ନିର୍ବାଚନ ନେଇ ସଙ୍କେତ ଦେଲେ ମୋଦି
ନୂଆଦିଲ୍ଲୀ (ବଡ଼ ଖବର ବ୍ୟୁରୋ) : ଜାମ୍ମୁ-କାଶ୍ମୀର ଖୁବଶୀଘ୍ର ନିର୍ବାଚନ ହେବ ବୋଲି ସଙ୍କେତ ଦେଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଜାମ୍ମୁ-କାଶ୍ମୀରର ବିଭିନ୍ନ ଦଳର ନେତାଙ୍କ ସହ ଆଲୋଚନା ପରେ ଟ୍ୱିଇଟ କରି ଏଭଳି ସଙ୍କେତ ଦେଇଛନ୍ତି ପ୍ରଧାନମନ୍ତ୍ରୀ। ଟ୍ୱିଇଟ କରି ସେ କହିଛନ୍ତି, ତୃଣମୂଳ ସ୍ତରରୁ ଗଣତନ୍ତ୍ରକୁ ମଜଭୁତ କରାଯିବ । ଖୁବଶୀଘ୍ର ଆରମ୍ଭ ହେବ ସୀମା-ପୁନଃନିର୍ଦ୍ଧାରଣ । ଦିଲ୍ଲୀ ବାସଭବନରେ ଜାମ୍ମୁ-କାଶ୍ମୀରର ବିଭିନ୍ନ ରାଜନୈତିକ ଦଳର ନେତାମାନଙ୍କ ଗୁରୁତ୍ୱପୂର୍ଣ୍ଣ ବୈଠକ ପରେ ପ୍ରଧାନମନ୍ତ୍ରୀଙ୍କ ଟ୍ୱିଇଟ୍ ବେଶ୍ ଗୁରୁତ୍ୱ ବହନ କରୁଛି ।
ବୈଠକ ପରେ ବରିଷ୍ଠ କଂଗ୍ରେସ ନେତା ଗୁଲାମ ନବୀ ଆଜାଦ କହିଛନ୍ତି, ପ୍ରଧାନମନ୍ତ୍ରୀଙ୍କ ଆଗରେ ୫ ବଡ ଦାବି ରଖାଯାଇଛି । ଜାମ୍ମୁ-କାଶ୍ମୀରକୁ ରାଜ୍ୟର ମାନ୍ୟତା ଦେବାକୁ ଦାବି କରାଯିବା ସହ ତୁରନ୍ତ ନିର୍ବାଚନ କରିବାକୁ ଦାବି କରାଯାଇଛି । ବର୍ତ୍ତମାନର ସମୟ ଜାମ୍ମୁ-କାଶ୍ମୀରକୁ ପୂର୍ଣ୍ଣ ରାଜ୍ୟର ମାନ୍ୟତା ଦେବାର ପ୍ରକୃଷ୍ଟ ସମୟ ବୋଲି ଗୁଲାମନବୀ କହିଛନ୍ତି । ବୈଠକରେ ସବୁ ଦଳ ତୁରନ୍ତ ଜାମ୍ମୁ-କାଶ୍ମୀରରେ ନିର୍ବାଚନ କରାଇବାକୁ ଦାବି କରିଛନ୍ତି ।
ପ୍ରଧାନମନ୍ତ୍ରୀ କହିଥିଲେ ,ଜାମ୍ମୁ-କାଶ୍ମୀରରେ ଗଣତାନ୍ତ୍ରିକ ପ୍ରକ୍ରିୟା ପାଇଁ କେନ୍ଦ୍ର ସରକାର ପ୍ରତିଶ୍ରୃତିବଦ୍ଧ। ଜାମ୍ମୁ-କାଶ୍ମୀର ୮ଟି ରାଜନୈତିକ ଦଳର ୧୪ ଜଣ ତୁଙ୍ଗ ନେତା ଏହି ବୈଠକରେ ଭାଗ ନେଇଥିଲେ । ୨୦୧୮ ମସିହାରୁ ଜମ୍ମୁ ଓ କାଶ୍ମୀରରେ ରାଷ୍ଟ୍ରପତି ଶାସନ ଜାରି କରାଯାଇଛି । ଜାମ୍ମୁ ଓ କାଶ୍ମୀରକୁ ରାଜ୍ୟମାନ୍ୟତା ଲାଗି ଗୁପକାର ସଂଗଠନ ଦାବି କରିଛି।