କେଜ୍ରିଓ୍ବାଲ ଗିରଫ, ରାତି ଅଧରେ ସୁପ୍ରିମକୋର୍ଟରେ ଆପ୍
ନୂଆଦିଲ୍ଲୀ(ବଡ଼ ଖବର ବ୍ୟୁରୋ): ଗିରଫ ହେଲେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ୱାଲ। ପ୍ରାୟ ୨ ଘଣ୍ଟାର ଜେରା ପରେ ଦିଲ୍ଲୀସ୍ଥିତ ବାସଭବନରୁ ଅରବିନ୍ଦ କେଜ୍ରିୱାଲଙ୍କୁ ଗିରଫ କରିଛି ଇଡି। ଦିଲ୍ଲୀ ଅବକାରୀ ଦୁର୍ନୀତି ଘଟଣାରେ ତାଙ୍କୁ ଇଡି ଗିରଫ କରିଛି। ଗିରଫ ପରେ ତାଙ୍କୁ ଇଡି ମୁଖ୍ୟାଳୟ ନିଆଯାଇଛି। ତେବେ ଗିରଫଦାରୀ ବିରୋଧରେ ଆପ୍ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଛି।
ଏଥିସହ ମାମଲାର ଜରୁରୀ ଶୁଣାଣି ପାଇଁ ଆବେଦନ କରିଛି। ସେହିପରି ଗିରଫଦାରୀ ସତ୍ତ୍ୱେ କେଜ୍ରିୱାଲ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେବେ ନାହିଁ। ସେ ଜେଲରୁ ରହି ସରକାର ଚଳାଇବେ ବୋଲି ଆପ୍ ପକ୍ଷରୁ କୁହାଯାଇଛି। ଆପ୍ର ବରିଷ୍ଠ ନେତା ତଥା ମନ୍ତ୍ରୀ ଆତିଶୀ କହିଛନ୍ତି, “ଇଡି କେଜ୍ରିୱାଲଙ୍କୁ ଗିରଫ କରିଛି ବୋଲି ଆମେ ଖବର ପାଇଛି। ଆମେ ସବୁ ବେଳେ କହିଛୁ ଯେ ଅରବିନ୍ଦ କେଜ୍ରିୱାଲ ଜେଲରୁ ସରକାର ଚଳାଇବେ।
ସେ ଦିଲ୍ଲୀର ମୁଖ୍ୟମନ୍ତ୍ରୀ ଥିଲେ ଓ ଦିଲ୍ଲୀର ମୁଖ୍ୟମନ୍ତ୍ରୀ ରହିବେ। ସେ ନିଜ ପଦରୁ ଆଦୌ ଇସ୍ତଫା ଦେବେ ନାହିଁ। ଆମେ ଗିରଫଦାରୀ ବିରୋଧରେ ସୁପ୍ରିମକୋର୍ଟରେ ପହଞ୍ଚିଛୁ। ଆମ ଓକିଲମାନେ ସୁପ୍ରିମକୋର୍ଟରେ ପହଞ୍ଚି ଆଜି ରାତିରେ ଜରୁରୀ ଶୁଣାଣି ପାଇଁ ଆବେଦନ କରିଛନ୍ତି। ଆମର ଆଶା ସୁପ୍ରିମକୋର୍ଟ ଶୁଣାଣି କରିବେ।” ଗିରଫ ପରେ ତାଙ୍କୁ ଇଡି ତା’ର ମୁଖ୍ୟାଳୟକୁ ନେଇଛି।
ସେଠାରେ ପୂର୍ବରୁ ସୁରକ୍ଷା ବ୍ୟବସ୍ଥା କଡ଼ା କଡ଼ି କରାଯାଇଥିଲା। ସେହିପରି ଇଡି ଅଫିସ ବାହାରେ ୧୪୪ ଧାରା ଜାରି କରାଯାଇଥିଲା। ଆସନ୍ତାକାଲି କେଜ୍ରିୱାଲଙ୍କୁ ସ୍ୱତନ୍ତ୍ର କୋର୍ଟରେ ହାଜର କରାଯିବ ବୋଲି କହିଛି ଇଡି।