ଦୁବାଇ, (ବଡ଼ ଖବର ବ୍ୟୁରୋ): ଆଜି ଆଇପିଏଲ ତ୍ରୟୋଦଶ ସିଜନର ୪୯ତମ ମ୍ୟାଚରେ ମୁହାଁମୁହିଁ ହେବେ ଚେନ୍ନାଇ ସୁପର କିଙ୍ଗସ ଓ କୋଲକାତା ନାଇଟ ରାଇଡର୍ସ । ମହେନ୍ଦ୍ର ସିଂ ଧୋନିଙ୍କୁ ଟକ୍କର ଦେବେ ଇଓନ ମୋର୍ଗାନ । ଉଭୟ ଦଳ ଆଜି ସେମାନଙ୍କ ତ୍ରୟୋଦଶ ମ୍ୟାଚ ଦୁବାଇରେ ଖେଳିବେ । କୋଲକାତା ୧୨ଟି ମ୍ୟାଚ ଖେଳି ୬ଟି ବିଜୟ ସହ ପଏଣ୍ଟ ଟେବୁଲର ପଞ୍ଚମ ସ୍ଥାନରେ ଥିବା ବେଳେ ଚେନ୍ନାଇ ୧୨ଟି ମ୍ୟାଚରୁ ୪ଟି ବିଜୟ ସହ ପଏଣ୍ଟ ଟେବୁଲର ଶେଷରେ ରହିଛି । ପୂର୍ବରୁ ଚେନ୍ନାଇ ଚଳିତବର୍ଷ ଆଇପିଏଲର ପ୍ଲେ ଅଫରୁ ବାଦ ପଡ଼ିଛି । ଆଜିର ମ୍ୟାଚରେ ଚେନ୍ନାଇ ପଏଣ୍ଟ ଟେବୁଲରେ କୋଲକାତାର ଅଙ୍କ ବିଗାଡ଼ିବାକୁ ପଡ଼ିଆକୁ ଓହ୍ଲାଇବ । ସେହିପରି କୋଲକାତା ଆଜିର ମ୍ୟାଚକୁ ଜିତି ପ୍ଲେ ଅଫ ପାଇଁ ଆଉ ଏକ ପାଦ ବଢ଼ାଇବ । କୋଲକାତାକୁ ପ୍ଲେ ଅଫକୁ ଯିବାକୁ ହେଲେ ତା’ର ଅବଶିଷ୍ଟ ଦୁଇଟି ମ୍ୟାଚ ଜିତିବା ସହ ପଏଣ୍ଟ ଟେବୁଲରେ ନିଜର ରନରେଟ ବଢ଼ାଇବାକୁ ପଡ଼ିବ ।
ଆଇପିଏଲ ଇତିହାସରେ ଉଭୟ ଦଳ ୨୨ଥର ସାମ୍ନାସାମ୍ନି ହୋଇଛନ୍ତି । ଚେନ୍ନାଇ ୧୩ଥର ଓ କୋଲକାତା ୮ଥର ବାଜି ମାରିଛି । ଚଳିତ ସିଜନରେ ଖେଳାଯାଇଥିବା ମ୍ୟାଚରେ ଚେନ୍ନାଇକୁ ୧୦ରନରେ ପରାସ୍ତ କରିଥିଲା କୋଲକାତା । ଆଜିର ମ୍ୟାଚକୁ ଜିତି ଗତ ମ୍ୟାଚର ପରାଜୟର ପ୍ରତିଶୋଧ ନେବା ସହ ପଏଣ୍ଟ ଟେବୁଲର ସମୀକରଣ ବଦଳାଇବାକୁ ଚେଷ୍ଟା କରିବ ଚେନ୍ନାଇ । ସେହିପରି ଆଜିର ମ୍ୟାଚକୁ ଜିତି ଟପ-୪କୁ ଯିବା ପାଇଁ ଚେଷ୍ଟା କରିବ କୋଲକାତା ।

Leave a Reply

Your email address will not be published. Required fields are marked *