ବଲାଙ୍ଗିର(ବଡ଼ ଖବର ବ୍ୟୁରୋ): ପଞ୍ଚଭୂତରେ ଲୀନ ହେଲା ଶ୍ରମିକ ନେତା ତଥା ସମାଜସେବୀ ଲଳିତ ନାୟକଙ୍କ ମର ଶରୀର । ବଲାଙ୍ଗିର ବିଭୁତିପଡ଼ା ସ୍ଥିତ ଶ୍ମଶାନରେ ତାଙ୍କର ଶେଷକୃତ ସମ୍ପନ୍ନ ହୋଇଛି। ତାଙ୍କ ପୁତୁରା ଜ୍ୟୋତି ନାୟକ ମୁଖାଗ୍ନି ଦେଇଛନ୍ତି । ଆଜି ଭୋରରେ ଭୁବନେଶ୍ୱର ଏମ୍ସରେ ଲଳିତ ନାୟକଙ୍କ ଦେହାନ୍ତ ହୋଇଥିଲା। ଦୀର୍ଘ ଦିନ ଧରି ସେ ମେଡିକାଲରେ ଥିଲେ । ଚିକିତ୍ସାଧୀନ ଅବସ୍ଥାରେ ତାଙ୍କର ପରଲୋକ ହୋଇଛି । ତାଙ୍କ ମର ଶରୀରର ଶେଷ ନର୍ଶନ ପାଇଁ ବଲାଙ୍ଗିର ରୁଗୁଡିପଡ଼ା ସ୍ଥିତ ଘରକୁ ନିଆଯାଇଥିଲା। ରାଜନୀତିରେ ନିଜର ପ୍ରତିପତ୍ତି ପ୍ରତିଷ୍ଠା କରିପାରିନଥିଲେ ମଧ୍ୟ ସମାଜସେବା ଓ ସ୍ୱେଛାକୃତ ରକ୍ତଦାନ କରି ସେ ସାରା ଓଡ଼ିଶାରେ ନିଜର ସ୍ଵତନ୍ତ୍ର ପରିଚୟ ସୃଷ୍ଟି କରିପାରିଥିଲେ। ପଶ୍ଚିମ ଓଡ଼ିଶା ଶ୍ରମିକ ସଂଗଠନର ସଭାପତି ସହ ପ୍ରାୟ ୫୦ ଟି ସଂଗଠନର ସଭାପତି ଭାବରେ ସେ କାର୍ଯ୍ୟ ତୁଲାଇ ଆସୁଥିଲେ। ଗତ ତିନି ଦଶନ୍ଧି ଧରି ସେ ନିଶ୍ୱାର୍ଥପର ଭାବେ ଲୋକଙ୍କ ସେବା କରି ଆସୁଥିଲେ। ତାଙ୍କ ବିୟୋଗରେ ସାରା ରାଜ୍ୟରେ ଶୋକର ଛାୟା ଖେଳିଯାଇଛି।
