ପୀଠେ ଅଷ୍ଟମୀ, ମଣ୍ଡପେ ସପ୍ତମୀ

ଭୁବନେଶ୍ୱର (ବଡ଼ ଖବର ବ୍ୟୁରୋ): ଯା ଦେବୀ ସର୍ବ ଭୂତେଷୁ … ବେଦଧ୍ବନି, ହୋମଯଜ୍ଞ, ଚଣ୍ଡୀପାଠରେ ଚାଲିଛି ମା’ଦୁର୍ଗାଙ୍କ ମହାସପ୍ତମୀ ପୂଜା । ମଣ୍ଡପରେ ଦର୍ଶନ ଦେଉଛନ୍ତି ମା’ । ଚଣ୍ଡୀପାଠରେ ଚାଲିଛି ଦେବୀଙ୍କ ମହାସପ୍ତମୀ ପୂଜା । ଶକ୍ତିପୀଠରେ ଆଜି ମହାଷ୍ଟମୀ । ସୁଉଚ୍ଚ ତୋରଣ ସାଙ୍ଗକୁ ଝଲସୁଛି ଭଳିକି ଭଳି ପୂଜା ମଣ୍ଡପ । ସେପଟେ ଜଗତସିଂହପୁର ଜିଲ୍ଲା ଝଙ୍କଡ଼ ବାସିନୀ ମା’ ଶାରଳାଙ୍କ ପୀଠରେ ଚାଲିଛି ନବରାତ୍ର ପୂଜା ।

ଯାଜପୁରର ଅଧିଷ୍ଠାତ୍ରୀ ଦେବୀ ମା’ ବିରଜାଙ୍କ ଠାରୁ ଆରମ୍ଭ କରି ସମ୍ବଲପୁରର ମା’ ସମଲେଶ୍ବରୀ, କଟକର ମା’ କଟକ ଚଣ୍ଡୀ, ଝଙ୍କଡ଼ ଶାରଳା, କାକଟପୁର ମଙ୍ଗଳା, ଘଟଗାଁର ମା’ ତାରିଣୀଙ୍କ ପାଖରେ ଚାଲିଛି ପୂଜାର୍ଚ୍ଚନା । ପୀଠମାନଙ୍କରେ ଆଜି ମା’ଙ୍କ ମହାଷ୍ଟମୀ ନୀତି ଅନୁଷ୍ଠିତ ହେବାକୁ ଥିବା ବେଳେ ମଣ୍ଡପରେ ମହାସପ୍ତମୀରେ ଭକ୍ତ ଓ ଶ୍ରଦ୍ଧାଳୁଙ୍କୁ ଦର୍ଶନ ଦେଉଛନ୍ତି ଦେବୀ ଦୁର୍ଗା । ଗତ ମୂଳାଷ୍ଟମୀଠାରୁ ଆରମ୍ଭ ହୋଇଥିବା ଷୋଡ଼ଶ ଉପଚାର ପୂଜା ଆଜିକୁ ୧୬ଦିନ ତଥା ଅନ୍ତିମ ଦିବସରେ ପହଞ୍ଚିଛି ଏବଂ ନବରାତ୍ର ପୂଜାର ଆଜି ଅଷ୍ଟମ ଦିବସ । ଯାହାକି ମହାଷ୍ଟମୀ ଭାବେ ପାଳନ କରାଯାଏ । ଏହି କ୍ରମରେ ଆଜି ମା’ ମହାଗୌରୀ ସ୍ୱରୂପରେ ଦର୍ଶନ ଦେଉଛନ୍ତି ।

ଏହି ମହାଷ୍ଟମୀ ଅବସରରେ ଆଜି ହଜାର ହଜାର ଶ୍ରଦ୍ଧାଳୁ ମାଆଙ୍କୁ ଦର୍ଶନ କରୁଛନ୍ତି । ସେହିଭଳି ପାରଳାଖେମୁଣ୍ଡି ସହରର ଅଙ୍କ ସାହିରେ ଥିବା ମାଆ ମାଣିକେଶ୍ବରୀଙ୍କ ମନ୍ଦିରରେ ମଧ୍ୟ ଷୋଡ଼ଶ ଉପଚାର ପୂଜାର୍ଚ୍ଚନା ଚାଲିଛି । ଗଜପତି ମହାରାଜଙ୍କ ଇଷ୍ଟଦେବୀ ମାଆ ମାଣିକେଶ୍ବରୀଙ୍କ ପୂଜାର ସ୍ଵତନ୍ତ୍ରତା ରହିଥିବା ବେଳେ ମାଆ ମାଣିକେଶ୍ବରୀଙ୍କ ସମେତ ସେହି ପୀଠରେ ପୂଜା ପାଉଛନ୍ତି ମାଆ କନକ ଦୁର୍ଗା । କନକ ଦୁର୍ଗାଙ୍କ ପୀଠରେ ପ୍ରତ୍ୟେକ ଦିନ ଚଣ୍ଡୀ ପାଠ ସହ ଆମିଷ ଭୋଗ କରାଯାଏ । ପୂଜା ଆରମ୍ଭ ଦିନଠାରୁ ମାନସିକଧାରୀମାନେ ଏଠାରେ ଅଖଣ୍ଡ ଦୀପ ଦାନ ପ୍ରଥା ରହିଥିବା ବେଳେ ଅଷ୍ଟମୀରେ ପଶୁ ବଳିର ପ୍ରଥା ରହିଛି ।