ରେଷ୍ଟୁରାଣ୍ଟରେ ଭୟଙ୍କର ଅଗ୍ନିକାଣ୍ଡ
ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ଦିଲ୍ଲୀ ମାଲଭିୟା ନଗରର ଏକ ରେଷ୍ଟୁରାଣ୍ଟରେ ନିଆଁ । ଏହି ଘଟଣାରେ ୧୦ ଜଣଙ୍କର ମୃତ୍ୟୁ ହୋଇଛି। ମୃତ୍ୟୁ ସଂଖ୍ୟା ବଢ଼ିପାରେ ବୋଲି ସୂଚନା ମିଳୁଛି। ଅଗ୍ନିକାଣ୍ଡ ଘଟିଥିବା ରେଷ୍ଟୁରାଣ୍ଟର ନାମ ଲେମନ ଗ୍ରୀନ। ବୁଧବାର ସକାଳ ୯.୪୫ରେ ଦିଲ୍ଲୀ ଅଗ୍ନିଶମ ସେବା (DFS) ଅଗ୍ନିକାଣ୍ଡ ସମ୍ପର୍କରେ ଏକ ଫୋନ ପାଇଥିଲା। ଅଗ୍ନିଶମ ବିଭାଗ କର୍ମଚାରୀମାନେ ରେଷ୍ଟୁରାଣ୍ଟର ବେସମେଣ୍ଟରୁ ଅନେକ ଲୋକଙ୍କୁ ସୁରକ୍ଷିତ ଭାବରେ ଉଦ୍ଧାର କରିଥିଲେ। ରେଷ୍ଟୁରାଣ୍ଟରୁ ଉଦ୍ଧାର କରାଯାଇଥିବା ଲୋକଙ୍କୁ ତୁରନ୍ତ ଆମ୍ବୁଲାନ୍ସ ଯୋଗେ ହସ୍ପିଟାଲକୁ ନିଆଯାଇଥିଲା।
ପୋଲିସ ଅଧିକାରୀମାନେ କହିଛନ୍ତି ଯେ, ଆହତଙ୍କ ଅବସ୍ଥା ବିଷୟରେ ବିସ୍ତୃତ ସୂଚନା ଡାକ୍ତରଙ୍କ ରିପୋର୍ଟ ପ୍ରକାଶ କରିବା ପରେ ହିଁ ଜଣାପଡିବ। ନେହେରୁ ପ୍ଲେସ (NRN) ଅଗ୍ନିଶମ କେନ୍ଦ୍ରର ଡିଭିଜନାଲ ଅଫିସର (DO) ରବିନ୍ଦର ଘଟଣାସ୍ଥଳରେ ଅଛନ୍ତି। ଘଟଣାସ୍ଥଳରେ ଅନେକ ଅଗ୍ନିଶମ ବାହିନୀ ଗାଡ଼ି ଉପସ୍ଥିତ ଅଛନ୍ତି। ଜଣେ ବରିଷ୍ଠ ଅଗ୍ନିଶମ ଅଧିକାରୀ କହିଛନ୍ତି ଯେ, ରେଷ୍ଟୁରାଣ୍ଟରେ ନିଆଁ ନିୟନ୍ତ୍ରଣ କରିବା ପାଇଁ ୧୦ଟି ଅଗ୍ନିଶମ ବାହିନୀ ଗାଡ଼ି ନିୟୋଜିତ କରାଯାଇଥିଲା। ନିଆଁକୁ ନିୟନ୍ତ୍ରଣ କରାଯାଇଛି। ଅଗ୍ନିଶମ ବାହିନୀ ଅଧିକାରୀମାନେ କୋଠାରେ ବଞ୍ଚିଥିବା ଲୋକଙ୍କୁ ଖୋଜିବା ପାଇଁ ସନ୍ଧାନ ଏବଂ ଉଦ୍ଧାର କାର୍ଯ୍ୟ କରୁଛନ୍ତି।
ଦକ୍ଷିଣ ଜିଲ୍ଲାର ଏସଡିଏମ ଜିତେନ୍ଦ୍ର କୁମାର କହିଛନ୍ତି ଯେ, ‘ଅଗ୍ନିକାଣ୍ଡ ସମ୍ପର୍କରେ ଖବର ମିଳିବା ମାତ୍ରେ ହିଁ ଆମେ ତୁରନ୍ତ ଡିଡିଏମଏ ସେଲ୍କୁ ସକ୍ରିୟ କରିଦେଇଥିଲୁ । ସୂଚନା ମୁତାବକ, ଉକ୍ତ କୋଠାର ଗ୍ରାଉଣ୍ଡ ଫ୍ଲୋରରେ ଏହି ରେଷ୍ଟୁରାଣ୍ଟଟି ଚାଲୁଥିଲା । ତେବେ କେଉଁ କାରଣରୁ ନିଆଁ ଲାଗିଲା, ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ ।’ ସେ ଆହୁରି ମଧ୍ୟ କହିଛନ୍ତି, “ବର୍ତ୍ତମାନ ସୁଦ୍ଧା ଘଟଣାସ୍ଥଳରୁ ୪ଟି ମୃତଦେହ ଉଦ୍ଧାର କରାଯାଇଛି ଏବଂ ଆହତଙ୍କ ସମେତ ପ୍ରାୟ ୪୭ ଜଣଙ୍କୁ ଗୁରୁତର ଅବସ୍ଥାରେ ଚିକିତ୍ସା ପାଇଁ ନିକଟସ୍ଥ ହସ୍ପିଟାଲରେ ଭର୍ତ୍ତି କରାଯାଇଛି ।
ନିଆଁର ଭୟାବହତା ଏତେ ଅଧିକ ଥିଲା ଯେ, କୋଠାର ଉପର ମହଲାରେ ଫସିଥିବା କିଛି ଲୋକ ନିଜ ଜୀବନ ବଞ୍ଚାଇବା ପାଇଁ ସ୍ଥାନୀୟ ଲୋକଙ୍କ ଦ୍ୱାରା ରାସ୍ତାରେ ବିଛାଯାଇଥିବା ଗଦି ଉପରକୁ ଡେଇଁଥିଲେ ।” ଅଗ୍ନିଶମ ବାହିନୀର ସୂଚନା ଅନୁଯାୟୀ, କୋଠାର ବେସମେଣ୍ଟରେ ପ୍ରବଳ ଧୂଆଁ ଜମି ରହିଥିବାରୁ ଉଦ୍ଧାରକାରୀ ଦଳକୁ ଭିତରକୁ ପ୍ରବେଶ କରିବାରେ ବେଶ୍ ଅସୁବିଧାର ସମ୍ମୁଖୀନ ହେବାକୁ ପଡ଼ୁଛି । ଅକ୍ସିଜେନ ମାସ୍କ ସାହାଯ୍ୟରେ ଜବାନମାନେ ଭିତରେ ଫସିଥିବା ଲୋକମାନଙ୍କୁ ବାହାରକୁ ଆଣିବା ପାଇଁ ନିରନ୍ତର ଚେଷ୍ଟା ଚଳାଇଛନ୍ତି ।