ତାଲିବାନ ସରକାରକୁ ସ୍ଥାୟୀ କରାଯାଉ: ଇମ୍ରାନ ଖାନ
ନୂଆଦିଲ୍ଲୀ(ବଡ଼ ଖବର ବ୍ୟୁରୋ): ତାଲିବାନ ସପକ୍ଷରେ ଓକିଲାତି ଛାଡୁନି ପାକିସ୍ତାନ । ତାଲିବାନକୁ ସମର୍ଥନ କରି ପାକିସ୍ତାନର ପ୍ରଧାନମନ୍ତ୍ରୀ ଇମ୍ରାନ ଖାନ କହିଛନ୍ତି ଯେ , ଆଫଗାନିସ୍ତାନ ବାସୀଙ୍କ ମଙ୍ଗଳ ପାଇଁ ତାଲିବାନ ସରକାରକୁ ସ୍ଥାୟୀ କରାଯାଉ । ଏ ନେଇ ଜାତିସଂଘର ସାଧାରଣ ପରିଷଦ ଅଧିବେଶନରେ କହିଛି ପାକିସ୍ତାନ । ଇମ୍ରାନ ଖାନଙ୍କ କହିବା ଅନୁଯାୟୀ , ତାଲିବାନ ସରକାରକୁ ଆଫଗାନିସ୍ତାନରେ ସ୍ଥାୟୀ କରିବା ଛଡା ଆଉ କୈାଣସି ଉପାୟ ନାହିଁ ।
ତେବେ ଜାତିସଂଘର କହିବା ଅନୁସାରେ ଆଫଗାନିସ୍ତାନର ୫୦ ପ୍ରତିଶତ ଜନତା ଏବେ ଦାରିଦ୍ର ସୀମାରେଖା ତଳକୁ ଚାଲିଯାଇଛନ୍ତି । ଏବେ ଯଦି ଆମେ ଆଫଗାନିସ୍ତାନକୁ ଉପେକ୍ଷା କରିବା ତେବେ ଆଗାମୀ ବର୍ଷ ଗୁଡିକରେ ୯୦% ଆଫଗାନିବାସୀ ଦାରିଦ୍ର ସୀମାରେଖା ତଳକୁ ଚାଲିଯାଇଥିବେ । ଜାତିସଂଘର କହିବା ଅନୁଯାୟୀ ଆଗକୁ ଏକ ବିରାଟ ସଙ୍କଟ ଆସୁଛି । ଏହାର ସଂଘାତିକ ପରିଣାମ କେବଳ ଆଫଗାନିସ୍ତାନର ବାସୀନ୍ଦା ନୁହଁନ୍ତି ଚାରିଆଡେ ଏହାର ପ୍ରଭାବ ଦେଖାଦେବ ବୋଲି ପାକ୍ ପ୍ରଧାନମନ୍ତ୍ରୀ କହିଛନ୍ତି । ଖାଲି ଏତିକି ନୁହେଁ ସେ ଆହୁରି କହିଛନ୍ତି ଯେ ବିଶ୍ୱ ସମୁଦାୟ ତାଲିବାନକୁ ଉତ୍ସାହିତ କରିବା ଆବଶ୍ୟକ, ଏବଂ ସେମାନଙ୍କ ମାନବିକ ଅଧିକାରକୁ ସମ୍ମାନ ଦେବା ଉଚିତ । ସେ କହିଛନ୍ତି ଯେ ଯଦି ବିଶ୍ୱ ସମୁଦାୟ ସେମାନଙ୍କୁ କଥାବାର୍ତ୍ତା କରିବାକୁ ଉତ୍ସାହିତ କରେ ତେବେ ଏହା ସମସ୍ତଙ୍କ ପାଇଁ ବିଜୟ ପରିସ୍ଥିତି ହେବ ।
ସୂତ୍ରରୁ ଜଣାପଡିଥିଲା ଯେ, ଗତ ଅଗଷ୍ଟରେ ମିଳିତ ଜାତିସଂଘ ଆଫଗାନିସ୍ତାନ ଉପରେ ଏକ ସ୍ୱତନ୍ତ୍ର ବୈଠକ କରିବାକୁ ପାକିସ୍ତାନ ଦାବି କରିଥିଲା । କିନ୍ତୁ ପରେ ଏହାକୁ ପ୍ରତ୍ୟାଖ୍ୟାନ କରାଯାଇଥିଲା ।