ଆବାସ ଯୋଜନାରୁ ବଞ୍ଚିତ ମଲ୍ଲିକା

ସାରସକଣା (ବଡ଼ ଖବର ବ୍ୟୁରୋ): ମୟୁରଭଞ୍ଜ ଜିଲ୍ଲା ସାରସକଣା ବ୍ଲକ ଭୁରୁଷାଣୀ ପଞ୍ଚାୟତର ୫୮ ବର୍ଷୀୟା ବିଧବା ମହିଳା ମଲ୍ଲିକା ମୁଦି । ପରିବାର କହିଲେ ପୁଅ, ବୋହୁ, ନାତି ଓ ନାତୁଣୀ । ପୁଅ ଟ୍ରକ ଚଲାଇ ଯାହା ରୋଜଗାର କରନ୍ତି ସେତିକିରେ ୫ପ୍ରାଣୀ କୁଟୁମ୍ବ ଚଳୁଛି । ଭଙ୍ଗା ଦଦରା ପଲିଥିନ୍ ଘରେ ବିତୁଛି ଏମାନଙ୍କ ଜୀବନ । ଆବାସ ଯୋଜନାରେ ପକ୍କାଘର ଖଣ୍ଡେ ଲାଗି ରାଜନେତାଙ୍କଠାରୁ ଆରମ୍ଭ କରି ପ୍ରଶାସନିକ ଅଧିକାରୀଙ୍କ ନିକଟକୁ ମଲ୍ଲିକା ଧାଇଁ ଧାଇଁ ନୟାନ୍ତ ହୋଇଥିଲେ ସୁଦ୍ଧା ଫଳାଫଳ ଶୂନ ।

ଭଙ୍ଗା ଦଦରା ପଲିଥିନ୍ ଟଣା ଘର କେତେବେଳେ ଯେ ଭୁସୁଡ଼ି ପଡ଼ିବ ତାର କିଛି ଭରସା ନାହିଁ । ପଞ୍ଚାୟତ କାର୍ଯ୍ୟାଳୟଠାରୁ ମାତ୍ର ୩୦୦ ମିଟର ଦୂରରେ ମଲ୍ଲିକାଙ୍କ ଘର ଥିବା ବେଳେ ତାଙ୍କ ଉପରେ ପଡ଼ିନାହିଁ କାହାର ନଜର । ସରପଞ୍ଚଙ୍କଠାରୁ ଆରମ୍ଭ କରି ବିଡିଓଙ୍କ ନିକଟରେ ବାରମ୍ବାର ଜଣାଇଛନ୍ତି ମଲ୍ଲିକା । ଶେଷରେ ନିରାଶ ହୋଇ ଆଉ କାହାକୁ ଗୁହାରି କରିବି ନାହିଁ ବୋଲି କହିଛନ୍ତି ମଲ୍ଲିକା ।