ବିଚ୍ ରାସ୍ତାରେ ଗୋଡ଼ାଇ ଗୋଡ଼ାଇ ହାଣିଲେ

ଭୁବନେଶ୍ୱର (ବଡ଼ ଖବର ବ୍ୟୁରୋ): ରାଜଧାନୀରେ ନିର୍ମମ ହତ୍ୟା । ଦିନ ଦ୍ୱିପ୍ରହରରେ ଜଣେ ମିଠା ଦୋକାନୀଙ୍କୁ ଗୋଡ଼ାଇ ଗୋଡ଼ାଇ ହାଣିଦେଲେ ଦୁର୍ବୃତ୍ତ । ଲିଙ୍ଗରାଜ ଥାନା ଅନ୍ତର୍ଗତ ସାମନ୍ତରାପୁର ବଜାରରେ ରବିବାର ଅପରାହ୍ନରେ ଘଟିଛି ଏଭଳି ବୀଭତ୍ସ କାଣ୍ଡ । ମୃତକଙ୍କ ନାମ ଜମ୍ବୁ ବୋଲି ଜଣାପଡ଼ିଛି । ବ୍ୟବସାୟିକ ଶତ୍ରୁତାରୁ ଏଭଳି ଘଟିଥିବା ସୂଚନା ମିଳିଛି । ସାମନ୍ତରାପୁରରେ ଥିବା ଦିଲୁଙ୍କ ମିଠା ଦୋକାନରେ ଜମ୍ବୁ କାମ କରୁଥିଲେ । କିଛିଦିନ ହେବ ଜମ୍ବୁ ଦିଲୁଙ୍କ ଦୋକାନରୁ ବାହାରି ନିଜେ ଏକ ଦୋକାନ କରିଥିଲେ । ଦିଲୁଙ୍କଠାରୁ ଜମ୍ବୁଙ୍କ ବେପାର ଭଲ ହେଉଥିଲା ।

ଏଥିରେ ବିବ୍ରତ ହୋଇ ଦିଲୁ ତାଙ୍କୁ ହତ୍ୟା କରିଥିବା ପୋଲିସର ପ୍ରାଥମିକ ତଦନ୍ତରୁ ଜଣାପଡ଼ିଛି । ଦିଲୁ ଏକ ଖଣ୍ଡାରେ ଜମ୍ବୁଙ୍କ ବେକକୁ ଆକ୍ରମଣ କରିଥିବା ପ୍ରତ୍ୟକ୍ଷଦର୍ଶୀ କହିଛନ୍ତି । ଘଟଣାସ୍ଥଳରେ ହିଁ ତାଙ୍କର ମୃତ୍ୟୁ ହୋଇଛି । ଏହି ଘଟଣା ପରେ ସେଠାରେ ତୀବ୍ର ଉତ୍ତେଜନା ପ୍ରକାଶ ପାଇଥିଲା । ଉତ୍ତ୍ୟକ୍ତ ଲୋକେ ଟାୟାର ଜାଳି ପୁରୀ-ଭୁବନେଶ୍ୱର ରାସ୍ତା ଅବରୋଧ କରିଥିଲେ । ପୋଲିସ ଘଟଣାସ୍ଥଳରେ ପହଞ୍ଚି ଉତ୍ତ୍ୟକ୍ତ ଲୋକଙ୍କୁ ବୁଝାଶୁଝା କରିବା ପରେ ରାସ୍ତାରୋକ ହଟିଛି । ପୋଲିସ ଘଟଣାର ତଦନ୍ତ ଜାରି ରଖିଛି ।