ପୋଲ ନିର୍ମାଣକୁ ସମ୍ପୂର୍ଣ୍ଣ କରିବାକୁ ଜାତୀୟ ରାଜପଥ ଅବରୋଧ
ବୌଦ୍ଧ (ବଡ଼ ଖବର ବ୍ୟୁରୋ): ୩ ବର୍ଷ ହେଲା ଅସମ୍ପୂର୍ଣ୍ଣ ପୋଲ ନିର୍ମାଣକୁ ସମ୍ପୂର୍ଣ୍ଣ କରିବାକୁ ଜାତୀୟ ରାଜପଥ ଅବରୋଧ । ୨୦୧୮-୧୯ ଆର୍ଥିକ ବର୍ଷରେ ୨୦ଲକ୍ଷ ବ୍ୟୟ ବରାଦରେ ବଣିଭୂଷଣପୁର ପଞ୍ଚାୟତ ଅନ୍ତର୍ଗତ ବାହାଲି ଠାରେ ଏକ ପୋଲ ନିର୍ମାଣ କାମ ଆରମ୍ଭ ହୋଇଥିଲା । ଏଥିପାଇଁ ମଧ୍ୟ ୧୨ ଲକ୍ଷ ଟଙ୍କା ବିଲ ମଧ୍ୟ ଉଠାଯାଇଥିଲା ।
ମାତ୍ର ଯେଉଁ ନିୟମ ଅନୁଯାୟୀ ପୋଲ ନିର୍ମାଣ କାମ ହେବା କଥା ସେଭଳି ଭାବେ ନିୟମରେ କାମ ହେଉନଥିବାରୁ ପଞ୍ଚାୟତରାଜ୍ ବିଭାଗ ପକ୍ଷରୁ କାମଟିକୁ ବନ୍ଦ କରାଯାଇଥିଲା । ଫଳରେ ବାହାଲି ଗ୍ରାମର ୧୫୦ ପରିବାର ଯିବା ଆସିବା ପାଇଁ ବିଶେଷ କରି ବର୍ଷା ଦିନେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି ।
ଏହି ପ୍ରତିବାଦରେ ଗ୍ରାମର ଶତାଧିକ ପୁରୁଷ ଓ ମହିଳା ଆଜି ସକାଳୁ ତେଇଶମାଇଲ ଠାରେ ୫୭ ନମ୍ବର ଜାତୀୟ ରାଜପଥ ଅବରୋଧ କରିଛନ୍ତି । ଉଭୟ ପାର୍ଶ୍ଵରେ ଶହ ଶହ ଗାଡିମୋଟର ଅଟକି ରହିଛି ।