ଭୁବନେଶ୍ୱର (ବଡ଼ ଖବର ବ୍ୟୁରୋ): ଓଡ଼ିଶା ପାଇଁ ଲଜ୍ଜା । ରାଜ୍ୟରେ ବଢିଚାଲିଛି ଶିଶୁ ଯୌନ ନିର୍ଯାତନା ମାମଲା । ଜାତୀୟସ୍ତରରେ ଓଡ଼ିଶା ହେଉଛି ବଦନାମ୍ । ସଦ୍ୟ ପ୍ରକାଶିତ ଜାତୀୟ ଅପରାଧିକ ବ୍ୟୁରୋ ରିପୋର୍ଟ ଅନୁସାରେ ଓଡ଼ିଶାରେ ଶିଶୁ ଯୌନ ନିର୍ଯାତନା ସମଗ୍ର ଦେଶରେ ସର୍ବାଧିକ । ଏହି ରିପୋର୍ଟ ଅନୁସାରେ ୨୦୧୮ ରେ ଓଡ଼ିଶା ପ୍ରଥମରେ ଥିବା ବେଳେ ୨୦୧୯ରେ ପୁଣି ସେହି ସ୍ଥାନ ବଜାୟ ରଖିଛି ।
ପୋକ୍ସୋ ଆକ୍ଟ (୧୪ ଏବଂ ୧୫) ଅନୁଯାୟୀ ୨୦୧୯ରେ ରାଜ୍ୟରେ ୫୪୨ଟି ଶିଶୁ ଯୌନ ନିର୍ଯାତନା ମାମଲା ରୁଜୁ ହୋଇଛି । ୨୦୧୮ରେ ୩୩୩ଟି ମାମଲା ରୁଜୁ ହୋଇଥିଲା । ଏହା ଦେଶର ସର୍ବାଧିକ ଶିଶୁ ଯୌନ ନିର୍ଯାତନା ମାମଲା ହୋଇଥିବାରୁ ଓଡ଼ିଶାର ସ୍ଥାନ ପ୍ରଥମରେ ଥିଲା । ୨୦୧୭ରେ ଓଡିଶାରେ ମାତ୍ର ୮ଟି ମାମଲା ରୁଜୁ ହୋଇଥିଲା । ରିପୋର୍ଟରେ ରାଜ୍ୟର ସ୍ଥାନ ଥିଲା ୭ । ମାତ୍ର ଶେଷ ଦୁଇବର୍ଷ ଏହି ଧରଣର ମାମଲା ବଢ଼ିଯାଇଛି । ସେପଟେ ୨୦୧୯ରେ ବିହାରରେ ୧୬୪ଟି ମାମଲା ବିଭିନ୍ନ ଥାନାରେ ରୁଜୁ ହୋଇଥିଲା । ଏହି ରିପୋର୍ଟ ଅନୁସାରେ ବିହାର ଦ୍ୱତୀୟ ସ୍ଥାନରେ ରହିଛି ।
