ବିହାର (ବଡ଼ ଖବର ବ୍ୟୁରୋ): ମହାରାଷ୍ଟ୍ର ରାଜନୀତି ହଲଚଲ ପରେ ଏବେ ବିହାରର ରାଜନୈତିକ ସ୍ଥିତି ସରଗରମ ରହିଛି । ବିହାର ରାଜନୀତିରେ ନାନା କଳ୍ପନା ଜଳ୍ପନା ଜାରି ରହିଛି । ମୁଖ୍ୟମନ୍ତ୍ରୀ ନୀତିଶ ଏବଂ ଜେଡିୟୁକୁ ନେଇ ରାଜନୈତିକ ଚର୍ଚ୍ଚା ଜୋର ଧରିଛି । କୁହାଯାଉଛି ବିଜେପି ସହିତ ହାତ ମିଳାଇ ପାରନ୍ତି ନୀତିଶ କୁମାର । ଯାହାକୁ ନେଇ ଏକ ସର୍ଭେ କରାଯାଇଛି । ସର୍ଭେରେ ୩୪ ପ୍ରତିଶତ ଲୋକେ ନୀତିଶ ବିଜେପିରେ ହାତ ମିଳାଇବାକୁ ନେଇ ସହମତି ପ୍ରକାଶ କରିଥିଲେ । ୪୮ ପ୍ରତିଶତ ଲୋକ ଏହାକୁ ମନା କରିଥିଲେ । ବିହାରରେ ଆରଜେଡି ଏବଂ ଜେଡିୟୁ ମିଳିତ ମେଣ୍ଟ ଜାରି ରହିବ ବୋଲି ସେମାନେ ମତାମତ ଦେଇଥିଲେ॥ ୧୮ ପ୍ରତିଶତ ଲୋକଙ୍କର ଏହି ପ୍ରସଙ୍ଗରେ କୌଣସି ଉତ୍ତର ନ ଥିଲା । ଏହି ସର୍ଭେରେ ୨୫୭୫ ଲୋକ ଅଂଶଗ୍ରହଣ କରିଥିଲେ ।
ଗତ ଗୁରୁବାର ଏବଂ ଶୁକ୍ରବାର ଏହି ସର୍ଭେ କରାଯାଇଥିଲା। ଏଥି ସହିତ ବିହାରର ପୂର୍ବତନ ମୁଖ୍ୟମନ୍ତ୍ରୀ ଜିତନ ରାମ ମାଂଝିଙ୍କ ଜେଡିୟୁ ଏବଂ ନୀତୀଶ କୁମାରଙ୍କ ଉପରେ ମଧ୍ୟ ଏକ ସର୍ଭେ କରାଯାଇଥିଲା। ଲୋକଙ୍କୁ ପଚରାଯାଇଥିଲା ମାଂଝି ଦାବି କରିଛନ୍ତି ଜେଡିୟୁ ଭାଙ୍ଗିଯିବ । ନୀତୀଶ କୁମାରଙ୍କ ସହ କେବଳ ୪ରୁ ୫ବିଧାୟକ ରହିବେ। ଆପଣ ତାଙ୍କ ଦାବି ସହିତ ସହମତ କି? ସର୍ଭେ ଫଳାଫଳ ଅନୁଯାୟୀ, ୩୮ ପ୍ରତିଶତ ଲୋକ ମାଂଝିଙ୍କ ଦାବିକୁ ସମର୍ଥନ କରିଥିଲେ। ଏଥିସହିତ ୫୧ ପ୍ରତିଶତ ଲୋକ କହିଥିଲେ ନୀତୀଶ କୁମାରଙ୍କ ଦଳ ଭାଙ୍ଗିବ ନାହିଁ। ଏହା ବ୍ୟତୀତ ୧୧ ପ୍ରତିଶତ ଲୋକ କୌଣସି ଉତ୍ତର ଦେଇ ନ ଥିଲେ।
