ଭଦ୍ରକ (ବଡ଼ ଖବର): ଘରେ ଜଣେ ହେଲେ ବି ନାହାଁନ୍ତି ପୁରୁଷ । ପରିବାର କହିଲେ ୫ଜଣ ବଢ଼ିଲା ଝିଅ ସାଙ୍ଗକୁ ୭୫ ବର୍ଷୀୟା ଅନ୍ଧୁଣୀ ଜେଜେମା । ୬ ପ୍ରାଣୀ କୁଟୁମ୍ବଙ୍କ ପେଟକୁ ଠିକସେ ମିଳୁନାହିଁ ଦୁଇମୁଠା ଦାନା । ଘର କଥା ନକହିବା ଭଲ । ଅସରାଏ ବର୍ଷା ହେଲେ ଘର ଭିତରେ ଭରିଯାଉଛି ପାଣି । ବହୁ ଦୁଃଖ କଷ୍ଟରେ ଚଳୁଛନ୍ତି ଏହି ପରିବାର । ଭଦ୍ରକ ଜିଲ୍ଲା ଭଣ୍ଡାରୀପୋଖରୀ ବ୍ଳକ ନାଆମି ପଞ୍ଚାୟତ ଅନ୍ତର୍ଗତ ସାତତୋଳା ଗାଁରୁ ଆସିଛି ଏଭଳି ଦୁଃଖଦ ଖବର । ସୁଦର୍ଶନ ନାୟକଙ୍କ ମୃତ୍ୟୁ ପରେ ଏବେ ଦୁର୍ଦ୍ଦିନରେ ଗତି କରୁଛି ତାଙ୍କ ପରିବାର । କେବଳ ରାସନକାର୍ଡ ଖଣ୍ଡକ ଛାଡି ଦେଲେ ଏମାନଙ୍କୁ କୌଣସି ସରକାରୀ ସହାୟତା ମିଳୁନଥିବା ଅଭିଯୋଗ ହେଉଛି । ଗରିବ ଲୋକଙ୍କ ସୁବିଧା ଲାଗି ସରକାର ବିଭିନ୍ନ ଯୋଜନା କରିଥିଲେ ସୁଦ୍ଧା ଏମାନଙ୍କ ଲାଗି ତାହା ସାତସପନ ।

ସୁଦର୍ଶନଙ୍କ ପରିବାର କହିଲେ ଝିଅ ରାଧିକା, ଅହଲ୍ୟା, ମେନକା, ସେବିକା, କବିତାଙ୍କ ସହ ସ୍ତ୍ରୀ ଏବଂ ବୁଢ଼ୀ ମା । ୧୦ ବର୍ଷ ପୂର୍ବେ ସୁଦର୍ଶନଙ୍କ ଦୁର୍ଘଟଣାରେ ମୃତ୍ୟୁୁ ହୋଇଥିଲା । ପରେ ପରେ ତାଙ୍କ ସ୍ତ୍ରୀ ସରୋଜିନୀ ପରଘରେ ମୂଲ ଲାଗି ପରିବାର ପୋଷୁଥିଲେ । ଏଇ ମାସେ ତଳେ ତାଙ୍କର ମୃତ୍ୟୁ ହେବାପରେ ପରିବାର ମୁଣ୍ଡରେ ପଡିଛି ଚଡକ । ପୂର୍ବରୁ ୩ଝିଅଙ୍କ ପାଠପଢ଼ାରେ ଡୋରି ବନ୍ଧା ହୋଇଥିବା ବେଳେ ଏବେ ଦୁଇଝିଅ ଗାଁ ସ୍କୁଲରେ ପଢ଼ୁଛନ୍ତି । ବଡ଼ଝିଅ ରାଧିକା ଜଣେ ମେଧାବୀ ଛାତ୍ରୀ ହୋଇଥିଲେ ସୁଦ୍ଧା ଅର୍ଥ ଅଭାବରୁ ପାଠପଢ଼ା ଅଧାରେ ବନ୍ଦ ହୋଇଯାଇଛି । ସରକାରୀ ସହାୟତା ମିଳିଲେ ରାଧିକା ପୁଣିଥରେ ପାଠ ପଢ଼ିବେ ବୋଲି ଆଶା ରଖିଛନ୍ତି ।

Leave a Reply

Your email address will not be published. Required fields are marked *