ହାଇଦ୍ରାବାଦ ଆଇଆଇଟିରେ ଓଡିଆ ଛାତ୍ରୀଙ୍କ ମୃତ୍ୟୁ

ସୋନପୁର(ବଡ଼ ଖବର ବ୍ୟୁରୋ): ଆଇଆଇଟି ହାଇଦ୍ରାବାଦରେ ଓଡ଼ିଆ ଛାତ୍ରୀଙ୍କ ଆତ୍ମହତ୍ୟା । ହତ୍ୟା ଅଭିଯୋଗ ଆଣିଲେ ପରିବାର ଲୋକେ । ମୃତ ଛାତ୍ରୀ ହେଉଛନ୍ତି ମମିତା ନାୟକ । ତାଙ୍କ ଘର ସୁବର୍ଣ୍ଣପୁର ଜିଲ୍ଲା ସୁବଳିଆ ଥାନା ଡୁମୁରି ଗାଁରେ । ମମିତାଙ୍କ ବୟସ ୨୧ ବର୍ଷ । ମମିତା ଜୁଲାଇ ୨୬ ତାରିଖରେ ତେଲେଙ୍ଗାନା ସଙ୍ଗାରେଡ୍ଡିଠାରେ ଥିବା ଆଇଆଇଟି ହାଇଦ୍ରାବାଦରେ ଏମଟେକରେ ନାମ ଲେଖାଇଥିଲେ ।

ମମିତା ଆତ୍ମହତ୍ୟା କରିଥିବା କଲେଜ କତ୍ତୃପକ୍ଷ ପୋଲିସକୁ ଖବର ଦେଇଥିଲେ । ପୋଲିସ ଘଟଣା ସ୍ଥଳରେ ପହଂଚି ତଦନ୍ତ କରିବା ସହ ଏକ ସୁଇସାଇଡ ନୋଟ ଜବତ କରିଥିଲା । ପାଠପଢାର ବୋଝ ଏବଂ ଆର୍ଥିକ ଅବସ୍ଥା ପାଇଁ ଆତ୍ମହତ୍ୟା କରିଥିବା ସୁଇସାଇଡ ନୋଟରେ ଉଲ୍ଲେଖ ଅଛି ।

ତେବେ ଛାତ୍ରୀ ଜଣକଙ୍କ ମୃତ୍ୟୁର କାରଣ ଅସ୍ପଷ୍ଟ ଥିବା ବେଳେ ମମିତାଙ୍କ ପରିବାର ଲୋକେ ର‌୍ୟାଗିଂ କରି ମାରିଦେଇଥିବା ଅଭିଯୋଗ କରିଛନ୍ତି । ମାତ୍ର ୧୦ ଦିନରେ ଛାତ୍ରୀ ଜଣକ କାହିଁକି ଆତ୍ମହତ୍ୟା କଲେ ତାହା ଜଣାପଡିନାହିଁ । ଆଜି ସନ୍ଧ୍ୟା ପର‌୍ୟ୍ୟନ୍ତ ମମିତାଙ୍କ ମୃତ ଦେହ ଗାଁ ରେ ପହଞ୍ଚିବ ବୋଲି ଜଣା ପଡ଼ିଛି ।