ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ଆସନ୍ତାକାଲିଠାରୁ ଆରମ୍ଭ ହେବ ସଂସଦର ବଜେଟ ଅଧିବେଶନ । ଆଜି ବସିବ ସର୍ବଦଳୀୟ ବୈଠକ । ଦିନ ୧୧ଟା ବେଳେ ବସିବ ବୈଠକ । ଗୃହକୁ ସୁରୁଖୁରୁରେ ପରିଚାଳନା କରିବା ପାଇଁ ଏହି ବୈଠକରେ ଗୁରୁତ୍ବ ଦିଆଯାଇପାରେ । ଗୃହରେ ହଙ୍ଗାମା ନକରି ସବୁ ପ୍ରସଙ୍ଗରେ କିଭଳି ଆଲୋଚନା ହୋଇପାରିବ, ବିଲ୍ ପାସ୍ ହୋଇପାରିବ, ସେ ନେଇ ବିରୋଧୀଙ୍କ ସହଯୋଗ ଲୋଡ଼ି ପାରନ୍ତି କେନ୍ଦ୍ର ସରକାର। ୨୩ ତାରିଖରେ ଲୋକସଭାରେ ବଜେଟ ମଧ୍ୟ ଆସିବାର ଅଛି । ନିର୍ମଳା ସୀତାରମଣ ବଜେଟ ଉପସ୍ଥାପନ କରିବେ ।
ନିର୍ବାଚନ ପରେ ଦେଶବାସୀଙ୍କୁ ସେ କ’ଣ ଦେଉଛନ୍ତି, ତା’ ଉପରେ ରହିଛି ସମସ୍ତଙ୍କ ନଜର । ମୋଦି ସରକାର ତୃତୀୟ ପାଳିର ପ୍ରଥମ ବଜେଟ ବସିବାକୁ ଯାଉଛି । ଏଥିରୁ ଜଣାପଡ଼ିବ ଆସନ୍ତା ୫ ବର୍ଷ ଯାଏଁ ସରକାରଙ୍କ ଏଜେଣ୍ଡାରେ କ’ଣ ରହିଛି । ଅଧିବେଶନରେ ୬ଟି ନୂଆ ବିଲ୍ ମଧ୍ୟ ଉପସ୍ଥାପନ କରିବାକୁ କେନ୍ଦ୍ର ସରକାର ଯୋଜନା ରଖିଛନ୍ତି । ତେଣୁ ସୁରୁଖୁରୁରେ ଗୃହ ଚଳାଇବାକୁ ସର୍ବଦଳୀୟ ବୈଠକରେ ବିରୋଧୀଙ୍କ ସହଯୋଗ ଲୋଡ଼ି ପାରନ୍ତି କେନ୍ଦ୍ର ସରକାର ।
ଏପଟେ ଆସନ୍ତାକାଲିଠାରୁ ବିଧାନସଭା ଅଧିବେଶନ। ଏହାପୂର୍ବରୁ ଆଜି ବସିବ ସର୍ବଦଳୀୟ ବୈଠକ । ପୂର୍ବାହ୍ନ ୧୧ରେ ବାଚସ୍ପତି ସୁରମା ପାଢୀଙ୍କ ଅଧ୍ୟକ୍ଷତାରେ ବସିବ ବୈଠକ। ବଜେଟ ଅଧିବେଶନକୁ ସୁରୁଖୁରରେ ପରିଚାଳନା ଲାଗି ସହଯୋଗ ଲୋଡିବେ ବାଚସ୍ପତି। ଏହି ବୈଠକ ପୂର୍ବରୁ ନିଯୁକ୍ତ ହେବେ ସରକାରୀ ଦଳ ମୁଖ୍ୟ ସଚେତକ ଓ ଉପ ମୁଖ୍ୟ ସଚେତକ । ସେହିପରି ୨୩ ତାରିଖରେ ଉପବାଚସ୍ପତି ଲାଗି ନାମାଙ୍କନ ହେବ । ସେହିଦିନ ୧୨ଟା ସୁଦ୍ଧା ନାମାଙ୍କନ ଦାଖଲ କରାଯିବ । ୨୪ରେ ଫଳାଫଳ ଘୋଷଣା ହେବ । ୨୫ ତାରିଖରେ ମୋହନ ସରକାର ତାଙ୍କର ପ୍ରଥମ ବଜେଟ ଉପସ୍ଥାପନ କରିବେ । ଅର୍ଥ ବିଭାଗକୁ ନିଜ ପାଖରେ ରଖିଥିବାରୁ ନିଜେ ଉପସ୍ଥାପନ କରିବେ ମୁଖ୍ୟମନ୍ତ୍ରୀ।
