ବିହାର (ବଡ଼ ଖବର ବ୍ୟୁରୋ): ୨୦୨୪ ନିର୍ବାଚନକୁ ନେଇ ଚାଲିଛି ମାନସମନ୍ଥନ । ସବୁ ଦଳ ନିଜ ନିଜ ଭିତରେ ଅଙ୍କକଷା ଆରମ୍ଭ କଲେଣି । ଅଗାମୀ ଲୋକସଭା ନିର୍ବାଚନକୁ ନେଇ ଜାତୀୟ ରାଜନୀତି ସରଗରମ ରହିଛି। ତେବେ କେନ୍ଦ୍ରମନ୍ତ୍ରୀ ପଶୁପତି ପାରଶ ବିହାରର ହାଜିପୁରରୁ ନିର୍ବାଚନ ଲଢିବେ ବୋଲି ଘୋଷଣା କରିଛନ୍ତି। ସେ କହିଛନ୍ତି ବିଜେପି ନେତୃତ୍ୱାଧୀନ ଏନଡିଏ ଏହି ଆସନରେ ତାଙ୍କ ଦାବିକୁ ସମର୍ଥନ କରିବ । କିନ୍ତୁ ଚିରାଗ ପାଶୱାନଙ୍କ ସମର୍ଥନ କରିବେ ନାହିଁ ।
କାରଣ ସେ ଏପର୍ଯ୍ୟନ୍ତ ମେଣ୍ଟର ଅଂଶ ହୋଇ ନାହାନ୍ତି। ସେ ଏକ ସାମ୍ବାଦିକ ସମ୍ମଳନୀ କରି କହିଛନ୍ତି, ଅନେକ ସ୍ଥାନରେ ଭୁଲ ବୁଝାବଣା ବ୍ୟାପିବାରେ ଲାଗିଛି ଯେ ଦାଦା-ପୁତୁରା ଏକ ହୋଇସାରିଛନ୍ତି । କିନ୍ତୁ ଏହା ହେଉଛି ଆମର ବିହାରର ସଂସ୍କୃତି। ମୁଁ ସର୍ମ୍ପକରେ ଦାଦା, ତେଣୁ ଆମର ବିହାର ସଂସ୍କୃତିରେ ପାଦ ଛୁଇଁ ବଡ଼ମାନଙ୍କୁ ପ୍ରଣାମ କରିବାର ପରମ୍ପରା ଅଛି । ସେଦିନ ଚିରାଗ ମଧ୍ୟ ସଭାକୁ ଯାଇଥିଲେ ଏବଂ ଯେତେବେଳେ ସେ ହଠାତ୍ ସାମ୍ନାକୁ ଆସିଲେ, ସେ ମୋର ପାଦ ଛୁଇଁଥିଲେ ।
ମୁଁ ମଧ୍ୟ ତାଙ୍କୁ ଆଶୀର୍ବାଦ ଦେଇଥିଲି । ଏହାକୁ ଅନ୍ୟ କୌଣସି ଊପାୟରେ ଗ୍ରହଣ କରିବା ସମ୍ପୂର୍ଣ୍ଣ ଭୁଲ୍ । ଆମର ଉଭୟଙ୍କର ଭିନ୍ନ ପାର୍ଟି ଅଛି । ମୋର ଏବଂ ଚିରାଗ ପାସୱାନଙ୍କ ରାଜନୀତି ଅଲଗା । ବୈଠକରେ ନିଶ୍ଚିତ ଭାବେ ଚିରାଗଙ୍କୁ ଡକାଯାଇଥିଲା । କିନ୍ତୁ ସେ ବର୍ତ୍ତମାନ ଏନଡିଏ ସହିତ ନାହାଁନ୍ତି । କିନ୍ତୁ ଆମେ ଏନଡିଏ ସହିତ ଅଛୁ।
