“ପିପିଲି ଦାୟିତ୍ୱ ନେବେ ନବୀନ”
ପିପିଲି (ବଡ଼ ଖବର ବ୍ୟୁରୋ): ପିପିଲି ଦଖଲ ପାଇଁ ବିଜେଡି, ବିଜେପି ଓ କଂଗ୍ରେସ ମଧ୍ୟରେ ଆରମ୍ଭ ହୋଇଗଲାଣି ଜୋରଦାର ଲଢେଇ । ତିନି ପ୍ରମୁଖ ଦଳର ନେତା ଲୋକଙ୍କୁ ମନେଇବାରେ ଅଣ୍ଟା ଭିଡିଲେଣି । ମାତ୍ର ପୂର୍ବପରି ଏହି ଆସନ ଅକ୍ତିଆର କରିବା ପାଇଁ ଭିନ୍ନ ତରିକା ଆପଣେଇବା ବିଚିତ୍ର ନୁହେଁ । ବିଜେପୁର, ପାଟକୁରା, କେନ୍ଦ୍ରାପଡ଼ା, ବାଲେଶ୍ୱର, ତିର୍ତ୍ତୋଲ ପରେ ଏବେ ପିପିଲି ନିର୍ବାଚନମଣ୍ଡଳୀର ଦାୟିତ୍ୱ ସମ୍ଭାଳିବେ ବିଜେଡି ସୁପ୍ରିମୋ, ଅର୍ଥାତ୍ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଏକଥା ଆମେ କହୁନୁ ।
ପୁରୀ ଜିଲ୍ଲା ବିଜେଡି ସଭାପତି ମହେଶ୍ୱର ମହାନ୍ତି କହୁଛନ୍ତି । ଆମେ ବୁଝିବା ଜୁନିୟର ମହାରଥୀ ମାନେ ପିପିଲିର ବିଜେଡି ପ୍ରାର୍ଥୀ ରୁଦ୍ର ମହାରଥୀଙ୍କୁ ଜିତାଇବା ପାଇଁ ବିଜେଡି ସୁପ୍ରିମୋ ଆପଣେଇବେ ସେହି ପୁରୁଣା ରଣନୀତି । ସାରା ଓଡ଼ିଶାର ମୁଖ୍ୟମନ୍ତ୍ରୀ ଥାଇବି ନିର୍ଦ୍ଧିଷ୍ଟ ଏକ ନିର୍ବାଚନମଣ୍ଡଳୀର ଦାୟିତ୍ୱ ନେବେ ବୋଲି ଘୋଷଣା କରିବେ ମୁଖ୍ୟମନ୍ତ୍ରୀ । ନବୀନଙ୍କ ପୁରୁଣା ଷ୍ଟ୍ରାଟେଜିକୁ ସମାଲୋଚନା କରିଛନ୍ତି କଂଗ୍ରେସର ପିପିଲି ପର୍ଯ୍ୟବେକ୍ଷକ ତଥା ପୂର୍ବତନ ମନ୍ତ୍ରୀ ବିଜୟଲକ୍ଷ୍ମୀ ସାହୁ ।
ନବୀନ ଯେଉଁ ନିର୍ବାଚନମଣ୍ଡଳୀର ଦାୟିତ୍ୱ ନେଇଛନ୍ତି ବୋଲି କହୁଛନ୍ତି, ସେଠାରେ କ’ଣ ବିକାଶ ହୋଇଛି ବୋଲି ପ୍ରଶ୍ନ କରିଛନ୍ତି ବିଜୟଲକ୍ଷ୍ମୀ । କିଛିଦିନ ତଳେ ପିପିଲି-ଡେଲାଙ୍ଗ ପାଇଁ ସ୍ୱତନ୍ତ୍ର ପ୍ୟାକେଜ ଘୋଷଣା କରିଥିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ମାତ୍ର ପିପିଲି ବ୍ଲକ ନୂଆଶାସନ ପଞ୍ଚାୟତ ଉପନିର୍ବାଚନରେ ବିଜେଡି ସମର୍ଥିତ ପ୍ରାର୍ଥୀ ଭୂଇଁ ଚାଟିବା ପରେ ଲୋକେ କାହାକୁ ଭରସା କରିବେ ମେ ୨ରେ ସ୍ପଷ୍ଟ ହେବ ।
