ଭୁବନେଶ୍ୱର (ବଡ଼ ଖବର ବ୍ୟୁରୋ): ଆସୁଛି ବଡ଼ ବାତ୍ୟା, ନେବ ‘ଭେରି ସିଭିୟର ସାଇକ୍ଲୋନ୍’ର ରୂପ ! ଉତ୍ତର ଆଣ୍ଡାମାନ ସାଗରକୁ ଘୂର୍ଣ୍ଣିବଳୟ ପ୍ରବେଶ କରିଥିବା ନେଇ ସୂଚନା । ଏହାର ପ୍ରଭାବରେ ଆସନ୍ତାକାଲି ବଙ୍ଗୋପସାଗରରେ ଏକ ଲଘୁଚାପ କ୍ଷେତ୍ର ସୃଷ୍ଟି ହେବାର ସମ୍ଭାବନା ରହିଛି ।  ଆସନ୍ତା ୩ ଦିନ ମଧ୍ୟରେ ଏହା ଅଧିକ ଘନୀଭୂତ ହେବା ନେଇ ପାଣିପାଗ ଆକଳନ କରାଯାଉଛି । ବିଭିନ୍ନ ବିଦେଶୀ ମଡେଲ୍‌ର ଆକଳନ ଅନੁଯାୟୀ ଏହା ବାତ୍ୟାର ରୂପ ନେଇପାରେ ଏବଂ ଆନ୍ଧ୍ରପ୍ରଦେଶ ଓ ଓଡ଼ିଶା ଉପକୂଳ ଦେଇ ଅତିକ୍ରମ କରିବାର ପୂର୍ବାନୁମାନ କରାଯାଉଛି । ଭାରତୀୟ ପାଣିପାଗ ବିଜ୍ଞାନ ବିଭାଗ ଏଯାଏଁ ବାତ୍ୟା ସୃଷ୍ଟି ହେବା ନେଇ କୌଣସି ପୂର୍ବାନୁମାନ ଜାରି କରିନାହିଁ। ଆଇଏମଡି ଅନୁସାରେ ଗଳ୍ପ ଅଫ୍ ଥାଇଲାଣ୍ଡ ଓ ପାର୍ଶ୍ଵବର୍ତ୍ତୀ ଥାଇଲାଣ୍ଡ ଏବଂ ମିଆଁମାର ଉପରେ ଥିବା ଘୂର୍ଣ୍ଣିବଳୟ ଉତ୍ତର ଆଣ୍ଡାମାନ ସାଗରକୁ ପ୍ରବେଶ କରିଛି। ଏହା ପଶ୍ଚିମ-ଉତ୍ତର ପଶ୍ଚିମ ଦିଗରେ ଗତି କରିବ।

୨୩ ତାରିଖବେଳକୁ ଦକ୍ଷିଣ ପୂର୍ବ ଏବଂ ପାର୍ଶ୍ଵବର୍ତ୍ତୀ ପୂର୍ବ-କେନ୍ଦ୍ରୀୟ ବଙ୍ଗୋପସାଗରରେ ଲଘୁଚାପରେ ପରିଣତ ହୋଇପାରେ। ପରେ ଉତ୍ତର-ପଶ୍ଚିମ ଦିଗରେ ମୁହାଁଇ ଘନୀଭୂତ ହେବା ସମ୍ଭାବନା ଅଛି। ଭୁବନେଶ୍ୱର ପାଣିପାଗ କେନ୍ଦ୍ର କହିଛି,ଏବେ ପାଗ ଶୁଖିଲା ରହିବ। କିନ୍ତୁ,୨୬ରୁ ବର୍ଷା ହୋଇପାରେ। ବିଦେଶୀ ମଡେଲ୍ ଇସିଂଡବଲୁଏଫ ଏବଂ ଜିଏଫଏସ କିନ୍ତୁ ଭୟାନକ ପୂର୍ବାନୁମାନ ଚିତ୍ର ଦେଖାଇଛନ୍ତି । ଏହି ଆକଳନ ଅନୁସାରେ ସମ୍ଭାବ୍ୟ ବାତ୍ୟା ଶକ୍ତିଶାଳୀ ରୂପ ନେଇ ଅତି ଭୀଷଣ କିମ୍ବା ଅତ୍ୟନ୍ତ ଭୟାନକ ବାତ୍ୟା ରୂପ ନେଇପାରେ । ପବନ ବେଗ ଘଣ୍ଟା ପ୍ରତି ୮୮ରୁ ୧୧୭କିଲୋମିଟର ରହିଲେ,ତାହାକୁ ଭୀଷଣ ବାତ୍ୟା କୁହାଯାଇଥାଏ। ୧୧୮-୧୬୫ କିମି ପବନ ହେଲେ ଅତି ଭୀଷଣ ବାତ୍ୟା କୁହାଯାଏ। ପବନ ବେଗ ଘଣ୍ଟା ପ୍ରତି ୧୬୫ କିମି ଟପିଲେ ତାହା ଅତ୍ୟନ୍ତ ଭୟାନକ ବାତ୍ୟା ହୋଇଥାଏ। ଏଥିରୁ ଅନୁମାନ କରାଯାଇପାରେ,ସମ୍ଭାବ୍ୟ ବାତ୍ୟା ଅତ୍ୟନ୍ତ ବିପଜ୍ଜନକ ସ୍ଥିତି ସୃଷ୍ଟି କରିପାରେ।