ରାୟଗଡା କଂଗ୍ରେସର ନିଆରା ବାହାଘର, ବିଜେପି ବରକୁ ବିଜେଡି କନ୍ୟା

ଗୁଣୁପୁର(ବଡ଼ ଖବର ବ୍ୟୁରୋ): ବିଜେପି ବରକୁ ବିଜେଡି କନ୍ୟା । ରାୟଗଡ଼ା ଜିଲ୍ଲା ଗୁଣୁପୁର ନିର୍ବାଚନମଣ୍ଡଳୀରେ ଦେଖିବାକୁ ମିଳିଛି ଭିନ୍ନ ବିବାହ । ପ୍ରଦେଶ କଂଗ୍ରେସ କମିଟିର ନିର୍ଦ୍ଦେଶକ୍ରମେ କେନ୍ଦ୍ରର ବିଜେପି ସରକାର ସହ ରାଜ୍ୟର ବିଜେଡି ସରକାରଙ୍କ ମଧ୍ୟରେ ବିବାହ ଉତ୍ସବ କରାଇଛି କ୍ରଂଗ୍ରେସ । କୋରାପୁଟ ସାଂସଦ ସପ୍ତଗିରି ଶଙ୍କର ଉଲାକା ଦିନିକିଆ ଗସ୍ତରେ ଗୁଣୁପୁର ଆସି ଏହି ବିବାହ ଉତ୍ସବରେ ଯୋଗ ହେଇଥିଲେ । ବିଜେପି-ବିଜେଡି ମଧ୍ୟରେ ମଧୁର ସମ୍ପର୍କ ଥିବା ଅଭିଯୋଗ କରି କଂଗ୍ରେସ ଏହି ବିବାହ ଆୟୋଜନ କରିଥିଲା ।

ଏହି ଅବସରରେ କଂଗ୍ରେସ ପକ୍ଷରୁ ସାଇକେଲ ଶୋଭାଯାତ୍ରା ଅନୁଷ୍ଠିତ ହୋଇଥିଲା । ହିନ୍ଦୁ ରୀତିନୀତିରେ ବିବାହ କରାଯିବା ସହ ଅବିକଳ ସେମିତି ଢଙ୍ଗରେ ହୋମ ଯଂଜ୍ଞ, ହସ୍ତଗଣ୍ଠି, ସିନ୍ଦୁର ପିନ୍ଧାଯାଇ ବିବାହ ସମ୍ପନ କରାଇଥିଲେ । ଶେଷରେ ବିବାହ ଭୋଜି ମଧ୍ୟ ଆୟୋଜନ କରାଯାଇଥିଲା । ଓଡ଼ିଶାକୁ ଧ୍ୱଂସ କରିବାକୁ ଉଭୟ ବିଜେଡି ଓ ବିଜେପି ହାତ ମିଳାଇଛନ୍ତି, ତେଣୁ ଏହି ଭ୍ରଷ୍ଟାଚାର ସରକାରଙ୍କ ବିରୋଧରେ ଆଗାମୀ ସାଧାରଣ ନିର୍ବାଚନରେ ଜନସାଧାରଣ ତାର ଉଚିତ୍ ଜବାବ ଦେବେ ବୋଲି ସେ ନିଜ ଅଭିବାଦନରେ କହିଥିଲେ ।