ସମ୍ବଲପୁର, (ବଡ଼ ଖବର ବ୍ୟୁରୋ): ବର୍ଷେ ହେବ ଦାଦନ ଖଟିବାକୁ ଯାଇଛନ୍ତି । ଏଯାଏଁ ଫେରି ନାହାନ୍ତି । କିଛି ଖବର ମଧ୍ୟ ତାଙ୍କର ନାହିଁ । ତାଙ୍କ ଫେରିବା ବାଟକୁ ଚାହିଁ ରହିଛନ୍ତି ପରିବାର ଲୋକେ । ସମ୍ବଲପୁର ଜିଲ୍ଲା କୁଚିଣ୍ଡା ବ୍ଲକ ନୂଆଡିହି ପୁଖୁରାମାଲ ଗାଁର ହରି ପିଙ୍କ । ଦାଦନ ଖଟିବାକୁ ସୁଦୁର ଗୋଆକୁ ଯାଇଥିଲେ ହରି । ବର୍ଷେ ବିତିଯାଇଥିଲେ ସୁଦ୍ଧା ତାଙ୍କର ପତ୍ତା ମିଳିନାହିଁ । ସ୍ୱାମୀଙ୍କ ଫେରିବା ବାଟକୁ ଚାହିଁ ରହିଛନ୍ତି ସ୍ତ୍ରୀ । ନିଖୋଜ ସ୍ୱାମୀଙ୍କୁ ଫେରାଇ ଆଣିବା ଲାଗି ସମ୍ବଲପୁର ଜିଲ୍ଲାପାଳଙ୍କ କାର୍ଯ୍ୟାଳୟ ଆଗରେ ଧାରଣା ଦେଇଛନ୍ତି ସୁଭାସିନୀ । ନିଖୋଜ ସ୍ୱାମୀଙ୍କ ସନ୍ଧାନ ଲାଗି ଜିଲ୍ଲା ପ୍ରଶାସନକୁ ସ୍ମାରକପତ୍ର ମଧ୍ୟ ପ୍ରଦାନ କରିଛନ୍ତି ସୁଭାସିନୀ ।
ନୂଆଡିହି ପୁଖୁରାମାଲ ଗାଁର ଜଣେ ବ୍ୟକ୍ତିଙ୍କ ସହ ହରି ଗୋଆର ପୁଞ୍ଜିକୁ ଦାଦନ ଖଟିବାକୁ ଯାଇଥିଲେ । ଯିବାର ମାତ୍ର ଦୁଇଦିନ ପରେ ନେଇଥିବା ବ୍ୟକ୍ତି ସୁଭାସିନୀଙ୍କୁ ଫୋନ କରି କହିଥିଲା ଯେ ତମ ସ୍ୱାମୀ ପାଗଳ ହୋଇ କେଉଁଆଡ଼େ ଚାଲିଯାଇଛନ୍ତି । ଯାହାକୁ ସହଜରେ ହଜମ କରିପାରିନଥିଲେ ସୁଭାସିନୀ । ଏନେଇ ମହୁଲପାଲି ଥାନାରେ ଅଭିଯୋଗ କରିଥିଲେ ସୁଦ୍ଧା କିଛି ସୁଫଳ ମିଳିନାହିଁ । ଦୀର୍ଘଦିନ ବିତିଯାଇଥିଲେ ସୁଦ୍ଧା ପୋଲିସ କିମ୍ବା ଶ୍ରମ ବିଭାଗର ନିଷ୍କିୟତା ସୁଭାସିନୀଙ୍କୁ ବ୍ୟଥିତ କରିଛି ।
ଶେଷରେ ବାଧ୍ୟ ହୋଇ ଜିଲ୍ଲାପାଳଙ୍କ କାର୍ଯ୍ୟାଳୟ ଆଗରେ ଧାରଣା ଦେଇଛନ୍ତି ସୁଭାସିନୀ । ଦଲାଲ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ସହ ହରିଙ୍କୁ ଫେରାଇ ଆଣିବାକୁ ନିବେଦନ କରିଛନ୍ତି ସୁଭାସିନୀ ।
