ଭୋପାଳ(ବଡ଼ ଖବର ବ୍ୟୁରୋ): ଜାତୀୟ କଂଗ୍ରେସକୁ ଗୋଟିଏ ପରେ ଗୋଟିଏ ଝଟକା ମିଳିବାରେ ଲାଗିଛି । କେତେବେଳେ ଜାତୀୟ ସ୍ତରରେ ତ ଆଉ କେତେବେଳେ ରାଜ୍ୟରେ । ଏହା ମଧ୍ୟରେ ମଧ୍ୟପ୍ରଦେଶର ବଡ଼ବାହାର କଂଗ୍ରେସ ବିଧାୟକ ସଚିନ ବିର୍ଲା ଦଳ ଛାଡ଼ିଥିବାର ଖବର ସାମ୍ନାକୁ ଆସିଛି । ଏ ଖବର ସାମ୍ନାକୁ ଆସିବା ପରେ ପୁଣିଥରେ କଂଗ୍ରେସକୁ ନେଇ ସାରା ଦେଶରେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି ।
ସେପଟେ କଂଗ୍ରେସ ଛାଡ଼ୁ ଛାଡ଼ୁ ମୁଖ୍ୟମନ୍ତ୍ରୀ ଶିବରାଜ ସିଂହ ଚୌହାନଙ୍କ ଉପସ୍ଥିତିରେ ସେ ବଡ଼ବାହରେ ଭାଜପାରେ ସାମିଲ ହୋଇଛନ୍ତି । ସବୁଠାରୁ ରୋଚକ କଥାଟି ହେଉଛି ଗୋଟିଏ ଦିନ ପୂର୍ବରୁ ସଚିନ ବିର୍ଲା ଖଣ୍ଡୱା ଲୋକସଭା ନିର୍ବାଚନମଣ୍ଡଳୀରେ କଂଗ୍ରେସ ପ୍ରାର୍ଥୀଙ୍କ ସମର୍ଥନରେ ପ୍ରଚାର କରିଥିଲେ । ଏବଂ ତା’ପର ଦିନ ବିଜେପିରେ ଯୋଗଦେଇଛନ୍ତି । ଏହାକୁ ନେଇ କଂଗ୍ରେସ ଓ ଭାଜପା ମଧ୍ୟରେ ଆରୋପ ପ୍ରତ୍ୟାରୋପ ଲାଗି ରହିଛି ।
