ପୁଣି ସ୍ୱାଭାବିକ ହେଲା ସ୍କୁଲ

ଭୁବନେଶ୍ୱର  (ବଡ଼ ଖବର ବ୍ୟୁରୋ): ପୁଣି ଆରମ୍ଭ ହୋଇଛି ସକାଳୁଆ ସ୍କୁଲ। ସକାଳ ୭ଟାରୁ ସାଢ଼େ ୧୧ଟା ବଦଳରେ ସାଢ଼େ ୬ରୁ ୧୧ଟା ଯାଏଁ ଶ୍ରେଣୀରେ ବସି ପାଠ ପଢୁଛନ୍ତି ଛାତ୍ରଛାତ୍ରୀ । ଗ୍ରୀଷ୍ମ ପ୍ରବାହର ସ୍ଥିତି ଦେଖି ଜିଲ୍ଲାପାଳ ମାନେ ଚାହିଁଲେ କ୍ଲାସ ଟାଇମିଂ ପରିବର୍ତ୍ତନ କରିପାରିବେ। ଏନେଇ ସ୍କୁଲ ଓ ଗଣଶିକ୍ଷା ବିଭାଗ ନିଷ୍ପତ୍ତି ନେଇଛି। ସେହିଭଳି ଆଜିଠୁ ରାଜ୍ୟର ସମସ୍ତ ଅଙ୍ଗନବାଡ଼ି କେନ୍ଦ୍ରରେ ସକାଳ ୭ଟାରୁ ଦିନ ୧୦ଟା ପର୍ଯ୍ୟନ୍ତ ପାଠପଢ଼ା ଚାଲିଛି। ସ୍କୁଲରେ ପାନୀୟଜଳ ଓ ଅନ୍ୟାନ୍ୟ ସୁବିଧା ପାଇଁ ନିର୍ଦ୍ଦେଶ ଦିଆଯାଇଛି। ପ୍ରବଳ ଗ୍ରୀଷ୍ମ ପ୍ରବାହ ପାଇଁ ଏପ୍ରିଲ ୧୨ରୁ ୧୬ତାରିଖ ପର୍ଯ୍ୟନ୍ତ ସ୍କୁଲ ବନ୍ଦ ଥିଲା।

୨୧ ତାରିଖରେ ସମସ୍ତ ବିଦ୍ୟାଳୟରେ ଯେପରି ପିଟିଏମ୍ ହୁଏ, ଜିଲ୍ଲା ଶିକ୍ଷା ଅଧିକାରୀ ଓ ଜିଲ୍ଲା ପ୍ରକଳ୍ପ ସଂଯୋଜକମାନେ ସେଥିପ୍ରତି ଗୁରୁତ୍ବ ଦେବେ ।  ପିଟିଏମ୍ ଉପସ୍ଥାନ ଓ ବୈଠକର ଟିକିନିଖି ତଥ୍ୟ ଉପସ୍ଥାନ ପଞ୍ଜୀକରଣରେ ଉଲ୍ଲେଖ ରହିବ । ଅଭିଭାବକଙ୍କ ବସିବା ପାଇଁ ବ୍ୟବସ୍ଥା କରାଇବା ଓ କ୍ୟାମ୍ପସର ସ୍ବଚ୍ଛତା ଉପରେ ସ୍କୁଲର ପ୍ରଧାନଶିକ୍ଷକମାନେ ଗୁରୁତ୍ବ ଦେବେ । ଡିଇଓ, ଡିପିସି, ଏଡିଇଓ, ଡିପିଓ ଅଫିସ୍, ଡିଆଇଇଟି ଶିକ୍ଷକ, ବିଇଓ, ଏବିଇଓ, ସିଆରସିସିମାନେ ପିଟିଏମ୍ ଉପରେ ତୀକ୍ଷ୍ନ ନଜର ରଖିବେ । ବୈଠକ ସରିବା କ୍ଷଣି ୨ରୁ ୫ଟି ଫଟୋ ସହ ସଂକ୍ଷିପ୍ତ ବିବରଣୀ ପ୍ରଧାନ ଶିକ୍ଷକମାନେ ଓସେପାକୁ ପଠାଇବେ ।