ଶାହାରୁଖଙ୍କ ପୁଅକୁ ମୁକ୍ତି ନାହିଁ
ମୁମ୍ବାଇ(ବଡ଼ ଖବର ବ୍ୟୁରୋ): ଶାହାରୁଖ ଖାନଙ୍କ ପୁଅ ଆର୍ଯ୍ୟନ ଖାନଙ୍କୁ ମିଳିଲାନି ବେଲ । ତାଙ୍କୁ ଏବେ ଜେଲରେ ରହିବାକୁ ପଡିବ । କୃଜ ପାର୍ଟି ମାମଲାରେ ଗିରଫ ହୋଇଥିବା ଆର୍ଯ୍ୟନ ଖାନଙ୍କ ଜାମିନ ନାମଞ୍ଜୁର କରି ଦେଇଛନ୍ତି ମୁମ୍ବାଇ କୋର୍ଟ । ତାଙ୍କ ସମେତ ମୁନମୁନ ଧମେଜା, ଅରବାଜଙ୍କ ଜାମିନ ମଧ୍ୟ ଖାରଜ କରିଦେଇଛନ୍ତି କୋର୍ଟ । ଜାମିନ ପାଇଁ ଆର୍ଯ୍ୟନଙ୍କ ଓକିଲଙ୍କୁ ବର୍ତ୍ତମାନ ସେସନ କୋର୍ଟର ଦ୍ୱାରସ୍ଥ ହେବାକୁ ପଡିବ । ଏହା ପୂର୍ବରୁ ଆଜି ଏହି ମାମଲାର ଶୁଣାଣି ସମୟରେ ଆର୍ଯ୍ୟନଙ୍କ ଓକିଲ ସତୀଶ ମାନସିନ୍ଦ କୋର୍ଟଙ୍କୁ କହିଥିଲେ ଯେ ଜାମିନ ପ୍ରଦାନ କରିବାର ମାଜିଷ୍ଟ୍ରେଟ କୋର୍ଟଙ୍କର କ୍ଷମତା ରହିଛି । ଏବେ ଜାମିନ ଶୁଣାଣି ପୂର୍ବରୁ ହିଁ ଆର୍ଯ୍ୟନଙ୍କୁ ଜେଲକୁ ପଠାଇ ଦିଆଯାଇଛି ।
ଆର୍ଯ୍ୟନଙ୍କ ସମେତ ୮ ଅଭିଯୁକ୍ତଙ୍କ ସହ ସେ ଜେଲ ପହଞ୍ଚିଛନ୍ତି । ଜେଲ ପଠାଇବା ପୂର୍ବରୁ ସମସ୍ତ ଅଭିଯୁକ୍ତଙ୍କ ଏନସିବି ଡାକ୍ତରି ଯାଞ୍ଚ କରିଛି । ପୁରୁଷ କଏଦିଙ୍କୁ ଆର୍ଥୋଡ ଜେଲ ନିଆଯାଇଥିବା ବେଳେ ମହିଳା କଏଦିଙ୍କୁ ବାଇକୁଲା ଜେଲ ପଠାଇ ଦିଆଯାଇଛି । ସେପଟେ ଆର୍ଯ୍ୟନ ଜେଲ ପହଞ୍ଚିବା ପରେ ବେଶ ଭୟଭୀତ ହୋଇଯାଇିବା ଜଣା ପଡିଛି । ଏବେ ଆର୍ଯ୍ୟନଙ୍କୁ ଜେଲରେ କ୍ୱାରେଣ୍ଟାଇନ ସେଲରେ ରଖାଯାଇଛି । ତେବେ ଗତ ୩ ତାରିଖରେ ଗୋଆ ଯାଉଥିବା ଏକ କୃଜ ପାର୍ଟି ଉପରେ ଏନସିବି ଚଢାଉ କରିଥିଲା । ଏଥିରେ ବଲିଉଡ ଷ୍ଟାର ଶାହାରୁଖ ଖାନଙ୍କ ପୁଅ ଆର୍ଯ୍ୟନ ଖାନ ତାଙ୍କ ବନ୍ଧୁ ମୁନମୁନ ଧମେଜା ଏବଂ ଅରବାଜଙ୍କୁ ଗିରଫ କରାଯାଇଥିଲା । ପରେ ଆଉ ୫ ଅଭିଯୁକ୍ତଙ୍କୁ ଏନସିବି ଧରିଥିଲା । ସେମାନଙ୍କୁ ପଚରାଉଚରା କରିବା ପରେ ଡ୍ରଗ୍ସ ମାମଲାରେ ସେମାନଙ୍କ ସମ୍ପୃକ୍ତି ଥିବା ନେଇ ଜଣାପଡିଥିଲା ।