ପର୍ଯ୍ୟଟକଙ୍କ ଗାଡ଼ି ଉପରେ ଖସିଲା ପଥର: ୯ମୃତ, ୩ ଆହତ
(ବଡ଼ ଖବର ବ୍ୟୁରୋ): ପାହାଡ଼ରୁ ପଥର ଖସି ଭୁଶୁଡ଼ିଲା ବ୍ରିଜ୍ । ହିମାଚଳ ପ୍ରଦେଶର କିନୌର ଜିଲ୍ଲାରେ ରବିବାର ଭୂସ୍ଖଳନ ଘଟି ୯ ପର୍ଯ୍ୟଟକଙ୍କ ମୃତ୍ୟୁ ହେବା ସହ ୩ ଆହତ ହୋଇଛନ୍ତି । ଉଦ୍ଧାର କାର୍ଯ୍ୟ ଜାରି ରହିଛି । ବାଟସେରୀର ଗୁନ୍ସା ନିକଟରେ ଛିତକୁଲରୁ ସାଙ୍ଗଲାକୁ ଆସୁଥିବା ପର୍ଯ୍ୟଟକଙ୍କ ଏକ ଗାଡି ଉପରେ ପଥର ଖସି ପଡିଥିଲା । ଗାଡି ଉପରେ ପଥର ଖସିଯିବା ଫଳରେ ନଅ ଜଣଙ୍କର ମୃତ୍ୟୁ ଘଟିଥିବା ବେଳେ ତିନି ଜଣ ଆହତ ହୋଇଛନ୍ତି।
କାରରେ ଥିବା ପର୍ଯ୍ୟଟକମାନେ ଦିଲ୍ଲୀ ଏବଂ ଚଣ୍ଡିଗଡ଼ରୁ ହିମାଚଳ ବୁଲିବାକୁ ଆସିଥିଲେ। ଦୁର୍ଘଟଣା ସମ୍ପର୍କରେ ସୂଚନା ପାଇବା ମାତ୍ରେ ପୁଲିସ ଏବଂ ପ୍ରଶାସନ ଘଟଣାସ୍ଥଳରେ ପହଞ୍ଚିଛନ୍ତି। କଂଗ୍ରେସ ବିଧାୟକ ଜଗତ ସିଂ ନେଗି କହିଛନ୍ତି ଯେ, ପାହାଡରୁ ଲଗାତାର ପଥର ଖସୁଥିବାରୁ, ଉଦ୍ଧାର କାର୍ଯ୍ୟରେ ସମସ୍ୟା ଉପୁଜୁଛି । ସେହିପରି ପଥର ଖସି ବଟାସେରୀ ଗାଁକୁ ସଂଯୋଗ କରୁଥିବା ବ୍ରିଜ୍ ମଧ୍ୟ ଭାଙ୍ଗି ଯାଇଛି। ବ୍ରିଜ୍ ଭାଙ୍ଗିଯିବାରୁ ଏହି ଗାଁ ବାହ୍ୟ ଯୋଗାଯୋଗରୁ ବିଚ୍ଛିନ୍ନ ହୋଇଯାଇଛି।