ପାଠ ପଢିବାକୁ ଆସି ଛାତ୍ର ସାଜିଲେ ଶିଶୁ ଶ୍ରମିକ
ମାହାଙ୍ଗା (ବଡ଼ ଖବର ବ୍ୟୁରୋ): ପାଠ ପଢିବାକୁ ଆସି ଛାତ୍ର ସାଜିଲେ ଶିଶୁ ଶ୍ରମିକ । ଭାଇରାଲ ଭିଡିଓକୁ ନେଇ ବୁଦ୍ଧିଜୀବୀଙ୍କ ଉଦବେଗ ପ୍ରକାଶ । ରାଜ୍ୟର ସମସ୍ତ ଶିକ୍ଷାନୁଷ୍ଠାନକୁ ଦଣ୍ଡମୁକ୍ତ ଘୋଷଣା କରିଛନ୍ତି ସରକାର । ସଭିଏଁ ପଢନ୍ତୁ, ସଭିଏଁ ବଢ଼ନ୍ତୁ । ଏଭଳି ନାରା ଦିଆଯାଇ ବିଦ୍ୟାଳୟରେ ଶୈକ୍ଷିକ ବାତାବରଣ ସୃଷ୍ଟି ପାଇଁ ଭରପୁର ପ୍ରୟାସ କରୁଛି ଶିକ୍ଷା ବିଭାଗ । ବିଦ୍ୟାଳୟ ଗୁଡିକର ରୂପାନ୍ତିକରଣ ନାରେ ସବୁଠି ପରିବର୍ତ୍ତନ ଓ ପ୍ରଗତିର ଛୁଆଁକୁ ନେଇ ତର୍କ ଆଉ ବିତର୍କର ଛକି ଶୂନ ଖେଳ ଚାଲିଛି ।
ପାଠପଢା ଚୁଲିକୁ ଗଲାଣି । ପିଲାମାନେ ଶ୍ରେଣୀଗୃହ ଛାଡି ହାତରେ ଖାତା କଲମ ଧରିବା ବଦଳରେ ଫାଉଡା, ଶାବଳ, ଲୁହାକଡା ଧରିବା ଘଟଣାରେ ଉଦବେଗ ପ୍ରକାଶ କରିଛନ୍ତି ବୁଦ୍ଧିଜୀବୀ । ମୁଣ୍ଡ ଉପରେ ସାଧାରଣ ନିର୍ବାଚନର ତାତି । ଠିକ ଏତିକି ବେଳେ କଟକ ଜିଲ୍ଲା ମାହାଙ୍ଗା ବ୍ଲକ ଅଂଚଳର ଏକ ସରକାରୀ ବିଦ୍ୟାଳୟରେ ଛାତ୍ରମାନେ ହାତରେ ଫାଉଡା ଧରି, ବାଲିଗୋଡି ଓ ସିମେଣ୍ଟ ଗୋଳେଇ ଲାଗିପଡିଛନ୍ତି କାର୍ୟ୍ୟରେ । ସରକାରୀ ନୀତି ନିୟମକୁ ଫୁ କରିଦେଇଛନ୍ତି ସ୍କୁଲ କର୍ତ୍ତୃପକ୍ଷ । ଘଟଣାଟି ଘଟିଛି ମାହାଙ୍ଗା ନିର୍ବାଚନ ମଣ୍ଡଳୀର ଶବଳକଣା ସରକାରୀ ଉଚ୍ଚ ବିଦ୍ୟାପୀଠରେ । ବହି ବସ୍ତାନିକୁ କ୍ଲାସ ରୁମରେ ରଖି ସ୍କୁଲ ହତା ଭିତରେ ଶ୍ରମିକ ସାଜିଛନ୍ତି ଛାତ୍ରମାନେ ।
ଏଠି ଗୋଡି-ସିମେଣ୍ଟ-ବାଲି ଗୋଳା ଚାଲିଛି । ଛାତ୍ରଙ୍କ ହାତରେ କୋଡ଼ି ଫାଉଡା ଶାବଳ । ପୋତାଯାଇଥିବା ଲୁହାଖୁଣ୍ଟ ମୂଳରେ ମସଲା ଭରୁଛନ୍ତି ବିଦ୍ୟାର୍ଥୀ । ଏମାନେ ସମସ୍ତେ ଶିଶୁ । ସାଜିଛନ୍ତି ଶିଶୁ ଶ୍ରମିକ । ଏଠି ପ୍ରଶ୍ନ ଉଠୁଛି ଦଣ୍ଡମୁକ୍ତ ଅଂଚଳରେ କଅଁଳ ହାତରେ ଏପରି କାର୍ଯ୍ୟ କରିବାପାଇଁ ଏମାନଙ୍କୁ କିଏ ଦେଲା ଅନୁମତି ? ସମ୍ପୃକ୍ତ ବିଦ୍ୟାଳୟର ପ୍ରଧାନଶିକ୍ଷକ ଏବଂ ବ୍ଲକ ଶିକ୍ଷାଧିକାରୀଙ୍କୁ ଘଟଣା ବାବଦରେ ପଚାରିବାକୁ ଉଦ୍ୟମ ହୋଇଥିଲେବି, କୌଣସି ପ୍ରତିକ୍ରିୟା ମିଳିପାରିନାହିଁ । ତେବେ ବେଆଇନି ଭାବେ ଏହି ବିଦ୍ୟାଳୟର ଛାତ୍ରଙ୍କୁ ଶିଶୁ ଶ୍ରମିକ ସଜେଇବା ଘଟଣାର କେବେ ହେବ ତଦନ୍ତ, ଏବଂ କଣ ନିଆଯିବ କାର୍ଯ୍ୟାନୁଷ୍ଠାନ, ସେକଥା ସମୟ କହିବ ।