ରାଜପଥ କଡ଼ରେ କାଲିର ଭବିଷ୍ୟତ

ସୁକିନ୍ଦା, (ବଡ଼ ଖବର ବ୍ୟୁରୋ): ଅନ୍ଧାର ରାତି । ୫୩ ନମ୍ବର ଜାତୀୟ ରାଜପଥରେ ଯିବା ଆସିବା କରୁଛି ଶହ ଶହ ଗାଡ଼ି ମଟର । ଗାଡ଼ି ଆଳୁଅରେ ସବୁ ଝାପସା ଝାପସା ଲାଗୁଛି । ଗାଡ଼ିଗୁଡିକର ହର୍ଣ୍ଣରେ କିଛି ଶୁଣାଯାଉନି । ଏତିକି ବେଳେ ଟର୍ଚ୍ଚ ଲାଇଟ୍ ଧରି ରାସ୍ତାକଡ଼ରେ ବସିଛି ଜଣେ ନିଷ୍ପାପ ବାଳକ । ସତେ ଯେମିତି ଘରର ସବୁ ଦାୟିତ୍ୱ ତା’ ମୁଣ୍ଡ ଉପରେ । ଢଳ ଢଳ ଆଖିରେ ଚାହି ରହିଛି ଗରାଖଙ୍କୁ । ରାସ୍ତାକଡ଼ରେ ସେ ମେଲିଛି ପସରା, ବାଡି଼ରେ ଫଳିଥିବା କଇଥର ପସରା ।

ଶିଳ୍ପ ଓ ଖଣି ଭରା ଅଞ୍ଚଳକୁ ସଂଯୋଗ କରୁଥିବା ୫୩ ନମ୍ବର ଜାତୀୟ ରାଜପଥ କଡ଼ରେ ଗରାଖଙ୍କୁ ଅପେକ୍ଷା କରିବସିଛି ଦେଶର ଭବିଷ୍ୟତ । ପରିବାରର ଖର୍ଚ୍ଚ ଉଠାଇବାକୁ ଯାଇ ରାସ୍ତା କଡରେ ବିକୁଛି କଇଥ । ସୁକିନ୍ଦା ବ୍ଳକ ସୁକିନ୍ଦାଗଡ଼ର ଜଲାଲ । ବୟସ ମାତ୍ର ୬ । ପରିବାରର ଅର୍ଥିକ ଅବସ୍ଥା ଭଲ ନାହିଁ । ଅଭାବ ଅନଟନରୁ ଘରେ ସବୁବେଳେ କଳି ଝଗଡା ଲାଗିରୁହେ । ପରିବାରର ଏଭଳି ଅବସ୍ଥା ଜଲାଲ ସହିପାରିଲାନି । ସବୁଦିନେ ସନ୍ଧ୍ୟାରେ ବାଡିରୁ କଇଥ ଆଣି ରାସ୍ତାକଡରେ ବିକ୍ରି କରୁଛି ।