ନବୀନଙ୍କ ଅଫରକୁ ମନା କରିଦେଇଥିଲେ ସୁର

ଭୁବନେଶ୍ୱର (ବଡ଼ ଖବର ବ୍ୟୁରୋ ): ବରିଷ୍ଠ କଂଗ୍ରେସ ନେତା ପ୍ରଦୀପ ମାଝୀ ଦଳରୁ ଇସ୍ତଫା ଦେବା ପରେ ପ୍ରତିକ୍ରିୟା ଦେବା ଜଟଣୀ ବିଧାୟକ ସୁରେଶ ରାଉତରାୟ ତାଙ୍କ ଅତୀତକୁ ମନେପକାଇଛନ୍ତି। ଗଣମାଧ୍ୟମକୁ ପ୍ରତିକ୍ରିୟା ଦେବାବେଳେ ସେ କହିଛନ୍ତି ୧୯ ବର୍ଷ ତଳେ ବିଜେଡିରେ ମିଶିବାକୁ ତାଙ୍କୁ ବି ଅଫର ଆସିଥିଲା। ନବୀନ ନିବାସକୁ ଡାକି ତାଙ୍କୁ ଏ ଅଫର ଦେଇଥିଲେ ନିଜେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ଜଟଣୀ କିମ୍ବା ଭୁବନେଶ୍ୱର, ଯେଉଁଠାରୁ ସେ ଚାହିଁବେ ଲଢ଼ିପାରିବେ ବୋଲି ତାଙ୍କୁ ଅଫର ଦିଆଯାଇଥିଲା। ତେବେ ସୁର ଏସବୁକୁ ସିଧା ସିଧା ମନା କରିଦେଇଥିଲେ। ସେ କହିଥିଲେ ମୁଁ ମରିବା ଯାଏଁ କଂଗ୍ରେସରେ ରହିବି। ଏହା ପରେ ନବୀନ ତାଙ୍କୁ ଥାଙ୍କ୍ ୟୁ କହି ବିଦାୟ ଦେଇଥିଲେ।

କଂଗ୍ରେସରୁ ଇସ୍ତଫା ଦେଇଥିବା ପ୍ରଦୀପ ମାଝୀଙ୍କ ଉପରେ ବର୍ଷିଛନ୍ତି ସୁର। ପ୍ରଦୀପ ମାଝୀ ଦଳରୁ ଇସ୍ତଫା ଦେବା କଥା ସେ ୮ ମାସ ତଳୁ ଜାଣିଥିବା କଥା କହିଛନ୍ତି । ସେ ଆହୁରି ମଧ୍ୟ କହିଛନ୍ତି ଯାହାର ପାୱାର ଓ ମନି ଦରକାର, ସେ ଗୋଟିଏ ଦଳରେ ସ୍ଥିର ରହେ ନାହିଁ। ନିଜ ସ୍ୱାର୍ଥ ପାଇଁ ଦଳ ଛାଡ଼ିଛନ୍ତି ପ୍ରଦୀପ। ସେ ଧୋକାବାଜ କାମ କରିଛନ୍ତି। ତାଙ୍କ ଇସ୍ତଫାରେ ଦଳ ଉପରେ କିଛି ପ୍ରଭାବ ପଡ଼ିବ ନାହିଁ।