ଦଳରେ ଉତ୍ସାହର ଅଭାବ ରହିଛି: ପ୍ରଦୀପ ମାଝୀ
ଭୁବନେଶ୍ୱର(ବଡ଼ ଖବର): କଂଗ୍ରେସକୁ ଗୋଟିଏ ପରେ ଗୋଟିଏ ବଡ଼ ଝଟକା ମିଳୁଛି । ସେ ଜାତୀୟ ସ୍ତରରେ ହେଉ କିମ୍ବା ପ୍ରଦେଶ ସ୍ତର । ବାରମ୍ବାର କଂଗ୍ରେସର କନ୍ଦଳ ସାମ୍ନାକୁ ଆସୁଛି । ପଞ୍ଜାବରେ କ୍ୟାପଟେନ ଅମରିନ୍ଦର ସିଂହଙ୍କ ଦ୍ୱାରା ଏକ ପୃଥକ ଦଳ ଗଠନ ହେବା ପରେ ବର୍ତ୍ତମାନ ଓଡ଼ିଶାର ପ୍ରଦେଶ କଂଗ୍ରେସ କମିଟିର କାର୍ଯ୍ୟକାରୀ ସଭାପତି ପ୍ରଦୀପ ମାଝୀ ଦଳରୁ ଇସ୍ତଫା ଦେଇଛନ୍ତି । ଏ ଖବର ସାମ୍ନାକୁ ଆସିବା ପରେ ସମଗ୍ର ରାଜନୈତିକ ମାହୋଲ ବେଶ ଚଳଚଞ୍ଚଳ ହୋଇ ଉଠିଛି । ଏହା ମଧ୍ୟରେ ନିଜ ଇସ୍ତଫାକୁ ନେଇ ସୋନିଆ ଗାନ୍ଧୀଙ୍କୁ ସେ ଏକ ଚିଠି ଲେଖିଥିଲେ । ଯାହା ବର୍ତ୍ତମାନ ସମସ୍ତଙ୍କର ଦୃଷ୍ଟିକୁ ଆକର୍ଷଣ କରିଛି । ତେବେ ବର୍ତ୍ତମାନ ଦଳରେ ଉତ୍ସାହର ଅଭାବ ରହିଛି । ତେଣୁ ମୁଁ ଅତ୍ୟଧିକ ଦୁଃଖ ଓ ଯନ୍ତ୍ରଣା ସହ ଦଳର ପ୍ରାଥମିକ ସଦସ୍ୟତାରୁ ଇସ୍ତଫା ଦେଉଛି ବୋଲି ସେ ତାଙ୍କ ଚିଠିରେ ଲେଖିଛନ୍ତି । କେବଳ ଏତିକି ନୁହେଁ ବରଂ ସେ ଦଳରେ ରହି ଲୋକଙ୍କ ସେବା କରିବାକୁ ଚାହୁଁଛନ୍ତି । କିନ୍ତୁ ଭୁଲ ନିଷ୍ପତ୍ତି ଯୋଗୁଁ ଦଳ ଲୋକଙ୍କ ବିଶ୍ୱାସ ହରାଇଛି ।
ସେହି ବିଶ୍ୱାସକୁ ଫେରାଇ ଆଣିବାକୁ ବର୍ତ୍ତମାନ ବହୁତ ସମୟ ଲାଗିବ । ଏହା ସହ ସେ ସୋନିଆ ଗାନ୍ଧୀଙ୍କ ନେତୃତ୍ୱକୁ ପ୍ରଶଂସା କରିବା ସହ ସ୍ଥାନୀୟ ସ୍ତରର ନେତୃତ୍ୱକୁ ବିଫଳତା ବୋଲି କହିଛନ୍ତି । ଅନ୍ୟପଟେ ପ୍ରଦୀପ ମାଝୀ କଂଗ୍ରେସ ଛାଡ଼ିବା ପରେ ଖୁବଶୀଘ୍ର ବିଜେଡିରେ ଯୋଗ ଦେବେ ବୋଲି ଅନୁମାନ କରାଯାଉଛି । କୁହାଯାଉଛି ଯେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଚଳିତ ମାସରେ ନବରଙ୍ଗପୁର ଗସ୍ତ କରିପାରନ୍ତି । ଏହି ସମୟରେ ପ୍ରଦୀପ ମାଝୀ ବିଜେଡିରେ ଯୋଗଦେଇ ପାରନ୍ତି । ସେପଟେ ୨୦୦୯ ମସିହାରେ କଂଗ୍ରେସରୁ ଟିକେଟ ପାଇ ଲୋକସଭା ସାଂସଦ ହୋଇଥିଲେ । କିନ୍ତୁ ଏହା ପରେ ତାଙ୍କୁ ପରାଜୟର ସାମ୍ନା କରିବାକୁ ପଡ଼ିଥିଲା ।
ପ୍ରଦୀପ ମାଝୀଙ୍କ ଇସ୍ତଫା ପରେ ପଞ୍ଚାୟତ ନିର୍ବାଚନ ପୂର୍ବରୁ ଦଳକୁ ଏକ ବଡ଼ ଅସୁବିଧାର ସମ୍ମୁଖୀନ ହେବାକୁ ପଡ଼ିଛି । କାହିଁକିନା ପ୍ରଦୀପ ମାଝୀଙ୍କ ଆଦିବାସୀ ସମ୍ପ୍ରଦାୟ ମଧ୍ୟରେ ଏକ ଭଲ ପ୍ରଭାବ ସବୁବେଳେ ରହିଥାଏ । ଏହାର ଅନେକ ଉଦାହରଣ ମଧ୍ୟ ରହିଛି । ଏପରିକି ନବରଙ୍ଗପୁର ଏବଂ ମାଲକାନଗିରି ଜିଲ୍ଲାରେ ପ୍ରଦୀପଙ୍କର ଭଲ ସ୍ଥାନ ରହିଛି । ତେଣୁ ତାଙ୍କର ଇସ୍ତଫା ଦେବା କଂଗ୍ରେସ ପାଇଁ ଏକ ବଡ଼ ଚିନ୍ତାର ବିଷୟ ପାଲଟିଛି ।