କିନ୍ନରଙ୍କ ହାତରେ ଧଳା ଜହର
ବାଲେଶ୍ଵର(ବଡ଼ ଖବର ବ୍ୟୁରୋ): ବ୍ରାଉନ ସୁଗାର ବା ଧଳା ଜହରର ହବ ପାଲଟିଲାଣି ବାଲେଶ୍ଵର। କେତେବେଳେ ସ୍ଥାନୀୟ ପୋଲିସ ତ କେତେବେଳେ ଏସଟିଏଫ ଚଢ଼ାଉ କରି କୋଟି କୋଟି ଟଙ୍କାର ବ୍ରାଉନ ସୁଗାର ଜବତ କରୁଛି । ଏସବୁ ପରେ ବି ବ୍ରାଉନ ସୁଗାର ବେପାର କମିବାରେ ଆଦୌ ନା ନେଉନି । ପ୍ରତ୍ୟେକ ଦିନ କୋଟି କୋଟି ଟଙ୍କାର ବ୍ରାଉନ ସୁଗାର ବେପାର ହେଉଛି । ପୋଲିସ ନାକ ତଳେ ବେଶ ସୁରକ୍ଷିତ ଭାବରେ ବେପାର ଜମୁଛି । ପୋଲିସ ଜାଣି ମଧ୍ୟ ଅଧିକାଂଶ ସମୟରେ ଚୁପ ରହୁଛି । ବିଶେଷ କରି ବାଲେଶ୍ଵରର ସହଦେଵଖୁଣ୍ଟା ଥାନା ଅଞ୍ଚଳ ଜହର ବେପାରୀ ମାନଙ୍କ ପାଇଁ ନିରାପଦ ସ୍ଥାନ ପାଲଟିଛି ।
ଏବେ ଧଳା ଜହରର ବେପାରରେ କିନ୍ନର ମାନେ ମଧ୍ୟ ଏଣ୍ଟ୍ରି ମାରିଛନ୍ତି । ଗତକାଲି ବାଲେଶ୍ବର ତେନ୍ତୁଳିଆ ଠାକୁରାଣୀ ମନ୍ଦିର ନିକଟରେ ଜଣେ କିନ୍ନର ଧଳା ଜହର ବେପାର କରୁଥିବା ସ୍ଥାନୀୟ ଲୋକେ ପ୍ରଥମେ ଜାଣିବାକୁ ପାଇ ଶିଳ୍ପାଞ୍ଚଳ ପୋଲିସକୁ ଖବର ଦେଇଥିଲେ । ପୋଲିସ ସେଠାରେ ପହଞ୍ଚି ୭୨ ଗ୍ରାମର ବ୍ରାଉନ ସୁଗାର ସହ ଖୋର୍ଦ୍ଧା ଅଞ୍ଚଳର ରବି ବେହେରା ଓରଫ ରାକ୍ଷୀ କିନ୍ନରଙ୍କୁ ଗିରଫ କରିଛି। ତେବେ ରାକ୍ଷୀଙ୍କୁ ପୋଲିସ ଗିରଫ କରିବା ସହ ତାଙ୍କ ପାଖରୁ ୩୦୦ ଟଙ୍କା ଓ ଗୋଟିଏ ମୋବାଇଲ ମଧ୍ୟ ଜବତ କରିଛି ।
ତେବେ ଏଇଠି ପ୍ରଶ୍ନ ଉଠୁଛି ଉକ୍ତ କିନ୍ନର ଯଦି ବ୍ରାଉନ ସୁଗାର ବେପାର କରୁଛନ୍ତି , ତେବେ ତାଙ୍କର ଏ ଚେର କେତେଯାଏ ଲମ୍ବିଛି । କାହା ଠାରୁ ସେ ଏହି ଧଳା ଜହର ଆଣୁଛନ୍ତି । ଏଥିରେ ଆଉ କେଉଁ କେଉଁ ମାନେ ସଂମ୍ପୃକ୍ତ ଅଛନ୍ତି । ପୋଲିସ ଏସବୁ ତଦନ୍ତ କଲେ ପ୍ରକୃତ ସତ୍ୟାସତ୍ୟ ବାହାରକୁ ଆସିପାରନ୍ତା ବୋଲି ସାଧାରଣରେ ଚର୍ଚ୍ଚା ହେଉଛି ।