ଅଭିଯୋଗ ଶୁଣିଲାନି ପ୍ରଶାସନ, ଘଣ୍ଟ ବାଡେଇ ପ୍ରତିବାଦ କଲେ ଗ୍ରାମବାସୀ
ଡେରାବିଶ (ବଡ଼ ଖବର ବ୍ୟୁରୋ): କେନ୍ଦ୍ରାପଡ଼ା ଜିଲ୍ଲା ଡେରାବିଶ ବ୍ଲକରେ ଥିଲା ଜିଲ୍ଲା ପ୍ରଶାସନର ଅଭିଯୋଗ ଶୁଣାଣି । ବାରମ୍ବାର ଅଭିଯୋଗ ପରେ ବି ଶୁଣୁ ନଥିଲା ବିଭାଗ କି ଜିଲ୍ଲା ପ୍ରଶାସନ । ଯାହାକୁ ନେଇ ଅଭିନବ ଭାବରେ ପ୍ରତିବାଦ କରିଛନ୍ତି ଲୋକେ । ଡେରାବିଶ ବ୍ଲକ ଖୋମଳ ପଞ୍ଚାୟତ ଠାରୁ କଟକ-ଚାନ୍ଦବାଲି ରାସ୍ତା ଚଣ୍ଡୀବଜାରକୁ ସଂଯୋଗ କରୁଥିବା ରାସ୍ତାର କାର୍ଯ୍ୟ ବିଗତ ୩ ବର୍ଷ ଧରି ରାସ୍ତା ସହ ପୋଲ କାମ ଚାଲୁଅଛି ।
ଯାହାକୁ ନେଇ ବିଭିନ୍ନ ସମସ୍ୟାର ସମ୍ମୁଖୀନ ହେଉଛନ୍ତି ଖୋମଳ ଗ୍ରାମବାସୀ । ନା ଗାଁକୁ ଆମ୍ବୁଲାନ୍ସ ଟିଏ ଯାଇ ହେଉଛି ନା ରାସ୍ତାରେ ଚାଷ କାର୍ୟ୍ୟ ପାଇଁ ବିଲକୁ ଯାଇହେଉଛି । ସେହି ଗାଁକୁ ଯିବାକୁ ହେଲେ ଅନ୍ୟ ଗାଁ ଦେଇ ଅଧିକ ୫ କିମି ବୁଲିକି ଯିବାକୁ ପଡୁଛି । ପୋଲ କାମ ଯୋଗୁଁ ଡ୍ରେନର ଉଭୟ ପାର୍ଶ୍ୱରେ ମାଟି ପଡ଼ିଥିବା ହେତୁ ଚାଷ ଜମିକୁ ପାଣି ମଧ୍ୟ ନିଷ୍କାସନ ହେଇପାରୁନି । ଯାହାକୁ ନେଇ ଗ୍ରାମବାସୀଙ୍କ ପକ୍ଷରୁ ଗତ ୩ ମାସ ହେବ ବାରମ୍ବାର ଗ୍ରାମ୍ୟଉନ୍ନୟନ ବିଭାଗ, ଜିଲ୍ଲାପାଳ ଓ ସ୍ଥାନୀୟ ବିଧାୟକଙ୍କୁ ଜଣାଇ ଥିଲେ ମଧ୍ୟ କୌଣସି ସୁଫଳ ନମିଳିବାରୁ ଗ୍ରାମବାସୀ ଓ ଯୁବକମାନେ ଘଣ୍ଟ ବାଡେଇ ପ୍ରତିବାଦ ଜଣେଇଥିଲେ ।
ସେପଟେ ଅଭିଯୋଗକାରି କହିଛନ୍ତି ବାରମ୍ବାର ବିଧାୟକଙ୍କୁ ଭେଟି ନିଜର ସମସ୍ୟା ଜଣାଇଥିଲେ ବି ଖୁବଶୀଘ୍ର ଏହାର ସମାଧାନ ହେଇଯିବ ବୋଲି ପ୍ରତିଶ୍ରୁତି ଦେଇ ଭୁଲି ଯାଇଛନ୍ତି ବିଧାୟକ । ବିଧାୟକଙ୍କର ଖାଇବା ଦାନ୍ତ ଗୋଟେ ଦେଖାଇବା ଦାନ୍ତ ଆଉ ଗୋଟେ ବୋଲି କଟାକ୍ଷ କରିଛନ୍ତି ଗ୍ରାମବାସୀ । ତେବେ ଆଗାମୀ ଦିନରେ ଅତିରିକ୍ତ ଜିଲ୍ଲାପାଳଙ୍କ ନିର୍ଦ୍ଦେଶକୁ କେତେ ମାନୁଛି ଗ୍ରାମ୍ୟଉନ୍ନୟନ ବିଭାଗ ତାହା ହିଁ ଦେଖିବାର ବାକି ରହିଲା।