ନୂଆଦିଲ୍ଲୀ(ବଡ଼ ଖବର ବ୍ୟୁରୋ): ଦିଲ୍ଲୀ ଦଙ୍ଗା ଏକ ସୁଚିନ୍ତିତ ଷଡଯନ୍ତ୍ର ଥିଲା । ଜାଣିଶୁଣି ଏଭଳି ଦଙ୍ଗା ପାଇଁ ପ୍ଲାନିଂ କରାଯାଇଥିଲା । ତେବେ ଫେବୃଆରୀ ୨୦୨୦ରେ ଦିଲ୍ଲୀରେ ହୋଇଥିବା ଦଙ୍ଗାକୁ ନେଇ ଦିଲ୍ଲୀ ହାଇକୋର୍ଟ ଏଭଳି ରାୟ ଦେଇଛନ୍ତି । ସୂଚନା ମୁତାବକ, ୨୦୨୦ ଫେବୃଆରୀ ୨୩ ତାରିଖରେ ରାଜଧାନୀ ଦିଲ୍ଲୀର ଉତ୍ତର-ପୂର୍ବାଞ୍ଚଳରେ ପ୍ରବଳ ଦଙ୍ଗା ହୋଇଥିଲା । ଯାହାକି ପ୍ରାୟ ୩ ଦିନ ଧରି ଜାରି ରହିଥିଲା । ତେବେ ସୋମବାର ଦିଲ୍ଲୀ ହିଂସା ମାମଲାରେ ଅଭିଯୁକ୍ତଙ୍କ ଜାମିନ ଆବେଦନ ଖାରଜ କରିବା ପରେ ଦିଲ୍ଲୀ ହାଇକୋର୍ଟ ଏହାକୁ ନେଇ ଏକ ଗୁରୁତ୍ୱପୂର୍ଣ୍ଣ ମନ୍ତବ୍ୟ ଦେଇଛନ୍ତି ।
କୋର୍ଟର ମନ୍ତବ୍ୟ ଅନୁସାରେ, ରାଜଧାନୀରେ ଆଇନ ବ୍ୟବସ୍ଥାକୁ ପ୍ରଭାବିତ କରିବା ପାଇଁ ଏହା ଏକ ଯୋଜନାବଦ୍ଧ ହିଂସା କରାଯାଇଥିଲା । ତେବେ ଭିଡିଓ ଫୋଟେଜରୁ ପ୍ରଦର୍ଶନକାରୀଙ୍କ ଆଚରଣ ସ୍ପଷ୍ଟ ଭାବରେ ଦର୍ଶାଉଛି ଯେ ସରକାରଙ୍କ ସମେତ ସାଧାରଣ ଲୋକଙ୍କ ଜୀବନକୁ ପ୍ରଭାବିତ କରିବା ପାଇଁ ଏହା ଏକ ସୁଚିନ୍ତିତ ଦଙ୍ଗା ଥିଲା ବୋଲି କୋର୍ଟ କହିଛନ୍ତି । ଜଷ୍ଟିସ ସୁବ୍ରମଣ୍ୟମ ପ୍ରସାଦ କହିଛନ୍ତି ଯେ, ଦୁର୍ବୃତ୍ତଙ୍କ ଦ୍ୱାରା ସିସିଟିଭି ଭାଙ୍ଗିବା, ସହରରେ ଆଇନ ଶୃଙ୍ଖଳାକୁ ଭଣ୍ଡରୁ କରିବା ପାଇଁ ପୂର୍ବରୁ ପ୍ଲାନିଂ କରାଯାଇଥିଲା । ଦିଲ୍ଲୀ ହାଇକୋର୍ଟ କହିଛନ୍ତି ଯେ, ଏଭଳି ଘଟଣା ହଠାତ ଘଟିନଥିଲା, ଏହା ଏକ ଯୋଜନାବଦ୍ଧ ଭାବେ ଷଡଯନ୍ତ୍ର ଥିଲା ।
