କାଠ ମାଫିଆଙ୍କୁ ଧରିବାରେ ବନ ବିଭାଗ ବିଫଳ

ନୂଆଗାଁ, (ବଡ଼ ଖବର ବ୍ୟୁରୋ): ନୟାଗଡ଼ ଜିଲ୍ଲା ନୂଆଗାଁ ଅଞ୍ଚଳରେ ମାତିଛନ୍ତି କାଠ ମାଫିଆ । ବନ ବିଭାଗ କର୍ମଚାରୀଙ୍କ ମନମୁଖି କାର୍ଯ୍ୟକଳାପ ଲାଗି ଖସିଯିବାରେ ସଫଳ ହେଉଛନ୍ତି କାଠ ମାଫିଆ । ଏନେଇ ବନବିଭାଗକୁ ବାରମ୍ବାର ଅଭିଯୋଗ କରୁଥିଲେ ସୁଦ୍ଧା ଫଳାଫଳ ଶୂନ । ବୁଧବାର କାଠ ଚାଲାଣ କରୁଥିବା ବେଳେ ସଂପଡ଼ା ଗ୍ରାମବାସୀଙ୍କ ହାବୁଡ଼ରେ ପଡ଼ିଯାଇଥିଲେ ମାଫିଆ । ଫଳରେ ଗାଡ଼ି ଛାଡ଼ି ପଳାଇଥିଲେ । ମହୀପୁର ବନ ବିଭାଗକୁ ଖବର ଦେଇଥିଲେ ଗାଁ ଲୋକେ । ରେଞ୍ଜର ଶୁଭ୍ରାଶୁଂ ଶେଖର ପଣ୍ଡାଙ୍କ ନିର୍ଦ୍ଦେଶକ୍ରମେ ବନ ବିଭାଗ କର୍ମଚାରୀ ଘଟଣାସ୍ଥଳରେ ପହଞ୍ଚି ୬୦ ଖଣ୍ଡ ପଟା ଜବତ କରିଛନ୍ତି ।

ପ୍ରତ୍ୟେକ ଦିନ ଜଙ୍ଗଲରୁ କାଠ ନେଇଯାଉଛନ୍ତି ମାଫିଆ । ଶାଳଗଛ ଭରା ଜଙ୍ଗଲ ଧୀରେ ଧୀରେ ପଦା ହେବାକୁ ବସିଲାଣି । ମୋଟା ଅଙ୍କର ଦରମା ନେଉଥିବା ବନ ବିଭାଗ କର୍ମଚାରୀ କିନ୍ତୁ ମାଫିଆଙ୍କୁ ଧରିବାରେ ବିଫଳ ହୋଇଛନ୍ତି । ଯାହାକୁ ନେଇ ସ୍ଥାନୀୟ ଲୋକଙ୍କ ମନରେ ଉଠିଛି ପ୍ରଶ୍ନବାଚୀ ।